పరలోకము నుండి వచ్చిన అధికుడు: యోహాను 3:31-36 | కార్మెల్ శోభ

యోహాను 3: 31-36

పైనుండి వచ్చు వాడు అందరి కంటే అధికుడు. భూలోకము నుండి వచ్చువాడు, భూలోకమునకు చెందినవాడు. అతడు భూలోక విషయములను గూర్చి మాట్లాడును. పరలోకము నుండి వచ్చు వాడు అందరి కంటే అధికుడు. ఆయన తాను చూచిన, వినిన విషయములను గూర్చి మాట్లాడును. పరలోకము నుండి వచ్చు వాడు అందరి కంటే అధికుడు. ఆయన తాను చూచిన, వినిన విషయములను గూర్చి సాక్ష్యము నిచ్చును. కాని , ఆయన సాక్ష్యమును ఎవరును అంగీకరింపరు. ఆయన సాక్ష్యము అంగీకరించినవాడు దేవుడు సత్యసంధుడని నిరూపించును. దేవునిచే పంపబడిన వాడు దేవుని విషయములను గూర్చి చెప్పును. ఎలన, దేవుడు ఆయనకు తన ఆత్మను సమృద్దిగ ఒసగును. తండ్రి కుమారుని ప్రేమించుచున్నాడు. ఆయన చేతికి సమస్తము అప్పగించి ఉన్నాడు. కుమారుని విశ్వసించు వాడు నిత్య జీవము పొందును. ఆయనకు విధేయించని వాడు జీవమును చూడలేడు. దేవుని కోపము అతనిపై నిలచి ఉండును.

ఈ సువిశేష భాగంలో యేసు ప్రభువు గురించి అనేక గొప్ప విషయాలు మనం చూస్తున్నాము. ఆయన పై నుండి వచ్చిన వాడు అని, అందరికంటే అధికుడు అని, ఆయన తన తండ్రి వద్ద చూచిన, వినిన విషయములను మాత్రమే మాటలాడుతాడు అని, ఆయన తాను చూసిన, వినిన విషయాలకు సాక్ష్యం ఇస్తున్నాడు అని, ఆయన సాక్ష్యం అంగీకరించిన వారు దేవుడు సత్య సంధుడు అని నిరూపిస్తారు అని, ఆయనకు ఆత్మ సమృద్దిగా ఇవ్వబడింది అని, తండ్రి ఆయనను ప్రేమిస్తున్నారు అని, సమస్తము మీద ఆయనకు అధికారం ఇవ్వబడింది అని, ఆయనను విశ్వసించు వారికి నిత్య జీవితం ఇవ్వబడుతుంది అని ఆయనను విశ్వాసించని వాని మీద దేవుని కోపం వుంటుంది అని ఈ సువిశేష భాగం తెలియచేస్తుంది.

1. క్రీస్తు దైవత్వము - పరలోక మూలాలు

"పైనుండి వచ్చు వాడు అందరి కంటే అధికుడు. భూలోకము నుండి వచ్చువాడు, భూలోకమునకు చెందినవాడు. అతడు భూలోక విషయములను గూర్చి మాట్లాడును." ఇక్కడ యేసు ప్రభువు తను ఎక్కడ నుండి వచ్చినది మాటలాడుతున్నారు. అందరు ఆయన ఈలోక పుట్టు పూర్వోత్తరాల గురించి మాటలాడుతున్నారు. కాని ఆయన నిజముగా తండ్రి దేవుని నుండి వస్తున్న విషయాన్ని మరచిపోతున్నారు. ఆయన పరలోకము నుండి వస్తున్నారు. ఆయన తండ్రి నుండి వచ్చాడు కనుక ఆయన తన తండ్రి వద్ద ఉన్న విషయములను గురించి మాటలాడుతున్నారు. తన తండ్రి వద్ద అనేక నివాస స్థలాలు ఉన్నవి అని చెబుతున్నారు, మనము ఆ లోకానికి చెందిన వారిమి అని అక్కడ మనకు నివాసం ఏర్పాటు చేస్తాను అని చెబుతున్నాడు. ఆయన పై నుండి వచ్చాడు, ఆయన అందరికంటే అధికుడు. ఆయన మన వలే కేవలం ఈలోకంలో పుట్టుట ద్వారా తన జీవితం మొదలు కావడం లేదు. ఆయన ఆది నుండి తన తండ్రితో ఉన్నాడు. కాని మనం ఈ లోకానికి చెందిన వారము. యేసు ప్రభువు అలా కాదు. ఆయన ఆది నుండి పరలోకానికి చెందినవాడు.

మానవ చరిత్రలో ఎందరో ప్రవక్తలు, జ్ఞానులు, గురువులు జన్మించారు. కానీ వారంతా భూమిపై జన్మించి, భూసంబంధమైన జ్ఞానాన్ని పొంది, భూలోక పరిమితులకు లోబడి మాట్లాడారు. వారు కేవలం దేవుని మార్గాన్ని వెదకిన వారు లేదా దేవుని సందేశాన్ని మోసుకొచ్చిన రాయబారులు మాత్రమే. కానీ యేసు క్రీస్తు అలా కాదు; ఆయన స్వయంగా మార్గమై ఉన్నాడు. ఆయన మూలాలు బెత్లెహేము తొట్టెలోనో లేదా నజరేతు గ్రామంలోనో ప్రారంభం కాలేదు. కాలము సృజింపబడక ముందే, సూర్యచంద్రులు ఉనికిలోకి రాకముందే, శూన్యంలో నుండి సృష్టి ఉద్భవించక ముందే ఆయన ఉన్నాడు. ఆయన ఆది యందు దేవునితో ఉన్న వాక్యము.

మనుషులమైన మనం కేవలం భూసంబంధమైన ఆలోచనలకే పరిమితమవుతాము. మన ఆశలు, ఆకాంక్షలు, భయాలు, వేదనలు అన్నీ ఇహలోకానికే సంబంధించినవి. అందుకే మానవుడు మాట్లాడేటప్పుడు భూలోక విషయాల గురించే మాట్లాడతాడు. సంపద, అధికారం, కీర్తి, భౌతిక సుఖాల చుట్టూనే మానవ మేధస్సు తిరుగుతుంది. కానీ పరలోకం నుండి దిగివచ్చిన క్రీస్తు, పరలోకపు విలువల గురించి మాట్లాడాడు. ఆయన మనకు భూమిపై ఎలా జీవించాలో నేర్పడమే కాక, మన అసలైన గమ్యస్థానమైన పరలోక సామ్రాజ్యం వైపు మన కన్నులను తిప్పాడు. "నా తండ్రి ఇంట అనేక నివాసములు ఉన్నవి" అని ఆయన చెప్పినప్పుడు, ఈ తాత్కాలిక లోకం మన శాశ్వత ఇల్లు కాదని, మనం పరలోక పౌరులమని ఆయన మనకు గుర్తుచేశారు.

2. పరలోకపు సాక్ష్యం - సత్య నిరూపణ

యేసు ప్రభువు ఇచ్చే సాక్ష్యం చాలా ముఖ్యం. ఆయన చూసిన వానికి, వినిన వానికి ఆయన సాక్షం ఇస్తున్నాడు. తాను తన ఇష్ట ప్రకారం లేక సొంతగా ఏమి చెప్పడం లేదు ప్రతిది తండ్రి నుండి చూసింది లేక వినినది మాత్రమే. ఆయన చెప్పే ప్రతి దానిని మనం విశ్వసించాలి. ఎందుకంటే ఆయన మాత్రమే తండ్రి నుండి వచ్చినది. ఆయన తండ్రి చేత పంపబడిన వాడు కనుక ఆయన తండ్రి యొక్క మాటలను చెబుతున్నాడు. ఆయన మాటలు కూడా జీవం కలిగి ఉన్నాయి. ఆయన ఈ లోకానికి వచ్చినది, ఆయన ద్వారా ఈ లోకం రక్షించబడాలి అని. ఆయన మాటల ద్వారా తన పనుల ద్వారా ఆ పనిని చేస్తున్నాడు.

లోకంలో ఎవరైనా ఒక విషయానికి సాక్ష్యమివ్వాలంటే, వారు దాన్ని కళ్లారా చూసి ఉండాలి లేదా చెవులారా విని ఉండాలి. యేసు క్రీస్తు తండ్రియైన దేవుని గూర్చి ఇచ్చే సాక్ష్యం అటువంటిదే. ఆయన పరలోకపు అంతఃపురాలలో తండ్రి హృదయాంతరాళాలను చూసినవాడు. తండ్రి ప్రేమను, ఆయన పవిత్రతను, ఆయన సంకల్పాన్ని నిరంతరం వీక్షించినవాడు. అందుకే యేసు మాటలలో ఎక్కడా సందిగ్ధత ఉండదు; కేవలం సంపూర్ణ సత్యం మరియు నిశ్చయత మాత్రమే ఉంటాయి.

కానీ విచారకరమైన విషయమేమిటంటే, ఈ లోకం సత్యాన్ని అంగీకరించడానికి ఇష్టపడదు. చీకటిలో జీవించడానికి అలవాటు పడిన మానవాళికి, పరలోకపు వెలుగును భరించడం సాధ్యం కాలేదు. అందుకే ఆయన సాక్ష్యాన్ని అనేకులు తృణీకరించారు. అయినప్పటికీ, ఎవరైతే విశ్వాసంతో ఆయన సాక్ష్యాన్ని అంగీకరిస్తారో, వారు ఒక గొప్ప సత్యాన్ని చాటిచెబుతున్నారు: "దేవుడు నమ్మదగినవాడు, సత్యసంధుడు." క్రీస్తును అంగీకరించడం అంటే కేవలం ఒక మతాన్ని స్వీకరించడం కాదు, దేవుని విశ్వసనీయతకు మన జీవితాల ద్వారా ముద్ర వేయడం. క్రీస్తు మాటలు కేవలం అక్షరాలు కావు, అవి "ఆత్మయు జీవమునై యున్నవి." అవి హృదయాలను మార్చే శక్తి గలవి, పాపపు బంధకాలను తెంచేవి, మరణపు అంచుల్లో ఉన్న వానికి నూతన నిరీక్షణను ఇచ్చేవి.

3. పవిత్రాత్మ సమృద్ధి మరియు దైవిక అధికారం

ఆయన పవిత్రాత్మ కలిగి వున్నాడు. తండ్రి తన కుమారునికి పవిత్రాత్మను సమృద్దిగా ఇచ్చారు. ఆయనను విశ్వసించిన వారికి ఆయన ఆ పవిత్రాత్మను ఇస్తాడు, పవిత్రాత్మ వారిని నడిపిస్తుంది. యేసు ప్రభువును తండ్రి ప్రేమిస్తున్నారు. యేసు ప్రభువుని తండ్రి ఎంతలా ప్రేమిస్తున్నారు అంటే ఈ లోకం మీద, సర్వ అధికారం ఆయనకు ఇచ్చారు. యేసు ప్రభువుని సాక్ష్యంను అంగీకరించిన వారు దేవుడు సత్యసంధుడు అని నిరూపిస్తారు.

దేవుడు ప్రవక్తలకు లేదా ఇతరులకు తన ఆత్మను ఒక కొలత ప్రకారం, నిర్దిష్టమైన కార్యం కొరకు మాత్రమే ఇచ్చేవారు. కానీ యేసు క్రీస్తు విషయానికి వస్తే, తండ్రి ఆయనకు తన ఆత్మను ఎటువంటి పరిమితులు లేకుండా, సమృద్ధిగా అనుగ్రహించాడు. ఎందుకంటే కుమారుడు తండ్రికి సంపూర్ణంగా విధేయుడై ఉన్నాడు. ఈ పవిత్రాత్మ అభిషేకం వలనే యేసు అద్భుతాలు చేశాడు, రోగులను స్వస్థపరిచాడు, దయ్యాలను వెళ్లగొట్టాడు, మరియు ఆత్మలో దీనులైన వారికి సువార్త ప్రకటించాడు.

అంతేకాదు, తండ్రికి కుమారునిపై ఉన్న అపరిమితమైన ప్రేమకు నిదర్శనం—ఆయన చేతికి సమస్తాన్ని అప్పగించడమే. ఈ విశ్వం, సృష్టి, భూమ్యాకాశాలు, మానవాళి యొక్క భూత, వర్తమాన, భవిష్యత్ కాలాలు అన్నీ క్రీస్తు అధికార పరిధిలోనే ఉన్నాయి. ఆయన కేవలం ఒక చారిత్రక పురుషుడు కాదు, ఆయన సర్వాధికారియైన ప్రభువు. ఈ అపారమైన అధికారం శిక్షించడానికి కాదు, రక్షించడానికి ఉపయోగించబడింది. ఎవరైతే క్రీస్తును తమ సొంత రక్షకునిగా అంగీకరిస్తారో, వారికి కూడా అదే పవిత్రాత్మను సమృద్ధిగా అనుగ్రహిస్తానని ఆయన వాగ్దానం చేశాడు. ఆ పవిత్రాత్మ మనకు సహాయకుడిగా, ఆదరణకర్తగా ఉంటూ, లోకపు శోధనలను జయించే శక్తిని ఇస్తుంది.

4. నిత్యజీవము లేదా దైవిక ఉగ్రత - మానవుని ఎంపిక

ఈ సువిశేష భాగం ముగింపులో మానవాళి ముందు ఒక స్పష్టమైన, గంభీరమైన ఎంపిక ఉంచబడింది. కుమారుని విశ్వసించు వాడు నిత్య జీవము పొందును, అయితే ఆయనకు విధేయించని వాడు జీవమును చూడలేడు. ఇక్కడ విశ్వాసము మరియు విధేయత అనేవి పరస్పర పూరకాలు. నిజమైన విశ్వాసం ఎల్లప్పుడూ విధేయతలోనే వ్యక్తమవుతుంది. క్రీస్తును నమ్ముతున్నామని చెప్తూ ఆయన ఆజ్ఞలను అతిక్రమించడం సాధ్యం కాదు.

నిత్యజీవము: ఇది కేవలం శారీరక మరణం తర్వాత వచ్చే జీవితం మాత్రమే కాదు. ఇది దేవునితో ఉండే నిరంతర సహవాసం, ఇప్పుడే, ఈ భూమిపైనే ప్రారంభమయ్యే ఒక నూతన గుణాత్మక జీవితం. క్రీస్తును హృదయంలో చేర్చుకున్న క్షణమే మనిషి మరణంలో నుండి జీవంలోకి దాటిపోతాడు.
దేవుని కోపము : దేవుని కోపము అనేది మనుషుల లాంటి స్వార్థపూరితమైన లేదా అనియంత్రితమైన కోపం కాదు. అది పవిత్రమైన దేవునికి పాపం పట్ల, అవిధేయత పట్ల ఉండే సంపూర్ణ వ్యతిరేకత. క్రీస్తు ద్వారా లభించే రక్షణను తిరస్కరించినప్పుడు, మనిషి తనంతట తానుగా దేవుని కృపకు దూరం చేసుకొని, ఆ ఉగ్రత క్రిందకు వెళ్తున్నాడు.

యేసుక్రీస్తు ఈ లోకానికి వచ్చింది తీర్పు తీర్చడానికి కాదు గానీ, తన ద్వారా లోకము రక్షణ పొందుటకే. కానీ ఆ రక్షణను నిర్లక్ష్యం చేస్తే, మానవునికి వేరే ఆశ్రయం లేదు. అందువల్ల, ఈ వాక్య భాగం మనల్ని మన అంతరాత్మను పరీక్షించుకోమని పిలుపునిస్తోంది. మనం పైనుండి వచ్చిన వాని మాటలకు లోబడుతున్నామా? లేదా భూసంబంధమైన ఆశలలో కొట్టుకుపోతున్నామా? క్రీస్తు సత్య సాక్ష్యాన్ని అంగీకరించి, పవిత్రాత్మ నడిపింపులో నడుస్తూ, నిత్యజీవపు వారసులుగా మారడమే ప్రతి క్రైస్తవుని ఉద్దేశ్యం కావాలి.

ప్రార్ధన : ప్రభువా! మీరు ఎవరు అని ఎంత గొప్ప వారు అని ఈ సువిశేష భాగం ద్వారా తెలుసుకుంటున్నాము. మీరు ఆది నుండి తండ్రితో ఉన్నారు. తండ్రి గురించి ఆయన ప్రేమ గురించి మీ ద్వారా మాత్రమే మేము తెలుసుకుంటున్నాము. కాని కొన్ని సార్లు మీరు మాకు చూపించిన తండ్రి ప్రేమను తెలుసుకోలేక పోతున్నాము. ఎంతగా తండ్రి మిమ్ములను ప్రేమిస్తున్నారో మేము వింటున్నాము అంతే కాదు తండ్రి మమ్ములను కూడా అలానే ప్రేమిస్తున్నారు అని మరచిపోతున్నాము, అటువంటి సమయాలలో మమ్ములను క్షమించండి. ప్రభువా ! మీకు సమస్తము మీద అధికారము ఇవ్వబడినది, నా మీద, జీవితం మీద కూడా మీకు పూర్తిగా అధికారం ఇవ్వబడింది, మీ మాటలను విశ్వసించే మంచి విశ్వసిగా నన్ను మార్చండి. నేను మీరు సత్య వంతులు అని నిరూపించే మీ శిష్యునిగా నన్ను మార్చండి. మీరు ఎలా తండ్రిని ప్రేమిస్తున్నారో, ఆయన చిత్తం నెరవేర్చడానికి ఎంత కష్టపడ్డారో, నేను కూడా మీ చిత్తం నెరవేర్చడానికి కావలసిన అనుగ్రహాలు ఇవ్వండి, తద్వార , మీరు నాకు చూపించిన ప్రేమకు నాకు మీ మీద ఉన్న ప్రేమను వ్యక్త పరిచేలా నాకు సహాయం చేయండి. ప్రభువా ! తండ్రి మీకు సమృద్దిగా పవిత్రాత్మను ఇచ్చిన విధంగా నాకు కూడా ఆత్మను ఇవ్వండి , ఆత్మ నన్ను నడిపేలా దీవించండి. ప్రభువా నేను ఎల్లప్పుడూ మిమ్ములను విశ్వసిస్తూ, మీరు వాగ్ధానం చేసే నిత్య జీవం నేను పొందేలా నన్ను ఆశీర్వాదించండి. ఆమెన్

Fr. Amruth