ఆత్మ వలన నూతన జన్మ: యోహాను 3:7-15 | కార్మెల్ శోభ

యోహాను 3:7-15

నీవు మరల జన్మింపవలెనని నేను చెప్పినందున నీవు ఆశ్చర్యపడవలదు. గాలి తనకు ఇష్టమైనటుల వీచును. నీవు దాని శబ్దమును విందువే కాని అది ఎక్కడ నుండి వచ్చునో, ఎక్కడకు పోవునో ఎరుగవు. ఆత్మ వలన జన్మించు ప్రతివాడును అట్లే ఉండును అనెను. ఇది ఎట్లు సాధ్యమగును? అని నికోదేము అడిగెను. అందుకు యేసు నీవు యిస్రాయేలు బోధకుడవై యుండి దీనినేరుగవా? మేము ఎరిగిన దానినే చెప్పుచున్నాము. చూచిన దానికే సాక్ష్యమిచ్చుచున్నాము. కాని, మా సాక్ష్యము మీరంగీకరింపరని మీతో నిశ్చయముగ చెప్పుచున్నాను. నేను మీతో భూలోక సంబంధమైన విషయములు చెప్పిన యెడల నమ్ముట లేదు. ఇక పరలోక సంబంధమైన విషయములు చెప్పిన యెడల ఎట్లు నమ్మెదరు? పరలోకము నుండి దిగి వచ్చిన మనుష్య కుమారుడు తప్ప ఎవడు పరలోకమునకు ఎక్కిపోలేదు. మోషే ఎడారిలో ఎట్లు సర్పమును ఎత్తెనో ఆయనను విశ్వసించు ప్రతివాడు నిత్యజీవము పొందుటకు అట్లే మనుష్య కుమారుడును ఎత్త బడవలెను.

1. ఆత్మ మూలముగా జన్మించుట: నూతన సృష్టి

యేసుప్రభువు నికోదేముతో "నీవు మరల జన్మింపవలెను" అని చెప్పినప్పుడు, నికోదేము ఒక శాస్త్రవేత్తలా, లౌకిక జ్ఞానంతో ఆలోచించాడు. వయసు పైబడిన మనుష్యుడు తిరిగి తల్లి గర్భంలోనికి ప్రవేశించి జన్మించడం ఎలా సాధ్యం? అనేది ఆయన ప్రశ్న. ఇక్కడ నికోదేము కేవలం భౌతికమైన, శరీరసంబంధమైన పుట్టుకను మాత్రమే ఊహించగలిగాడు. కానీ యేసుప్రభువు ఇక్కడ ప్రస్తావిస్తున్నది ఆత్మ సంబంధమైన పుట్టుక గురించి.

శారీరక జన్మ - ఆత్మ జన్మ

శరీర మూలముగా జన్మించినది శరీరమైయుండును: మానవ నైజం ప్రకారం పుట్టే ప్రతి ఒక్కరూ పాప స్వభావాన్ని, బలహీనతలను పిత్రార్జితంగా పొందుతారు. ఇది నశించిపోయే స్వభావం.
ఆత్మ మూలముగా జన్మించినది ఆత్మయైయుండును: ఇది దేవుని వాక్యము ద్వారా, పరిశుద్ధాత్మ శక్తి ద్వారా హృదయంలో జరిగే ఒక దైవిక కార్యం. ఇది అమరమైనది, పరలోక సంబంధమైనది.

గాలితో పోలిక: దైవిక రహస్యం

యేసుప్రభువు ఆత్మ కార్యమును గాలితో పోల్చారు. గాలి ఎటు నుండి వస్తుందో, ఎటు పోతుందో ఎవరూ కంటితో చూడలేరు. కానీ, గాలి వీచినప్పుడు చెట్ల ఆకులు కదలడం, చల్లదనం కలగడం ద్వారా దాని ఉనికిని మనం గుర్తించగలం. అలాగే, ఒక వ్యక్తి ఆత్మ ద్వారా నూతన జన్మ పొందినప్పుడు, ఆ మార్పు కంటికి నేరుగా కనిపించకపోయినా, అతని ప్రవర్తన, మాటతీరు, జీవన విధానంలో వచ్చే అద్భుతమైన మార్పుల ద్వారా (ఆత్మ ఫలాల ద్వారా) అతనిలో దేవుని ఆత్మ పనిచేస్తుందని లోకానికి స్పష్టంగా తెలుస్తుంది.

2. జ్ఞానస్నానము మరియు మారుమనస్సు

ఆత్మ మూలముగా జన్మించడం అంటే ప్రాథమికంగా మారుమనస్సు (Metanoia) పొందడం మరియు జ్ఞానస్నానము (Baptism) ద్వారా పవిత్ర పరచబడడం.కడగబడుట మరియు నూతనత్వము

జ్ఞానస్నానము అనేది కేవలం ఒక బాహ్య ఆచారం కాదు, అది అంతర్గత శుద్ధీకరణకు గుర్తు. నీటిలో మునగడం ద్వారా విశ్వాసి తన పాత పాప జీవితాన్ని క్రీస్తుతో పాటు సమాధి చేస్తున్నాడు. నీటి నుండి పైకి రావడం ద్వారా క్రీస్తు పునరుత్థాన మహిమలో పాలిభాగస్థుడై, నూతన జీవము కలిగినవాడిగా జీవించడం ప్రారంభిస్తాడు.

అపోస్తలుడైన పౌలు రోమీయులకు రాసిన పత్రిక (6:4) లో ఇలా అంటారు: "కాబట్టి తండ్రి మహిమవలన క్రీస్తు మృతులలో నుండి యేలాగు లేపబడెనో, అలాగే మనమును నూతనజీవము పొందినవారమై నడుచుకొనునట్లు, మనము బాప్తిస్మమువలన మరణములో పాలుపొందుటకై ఆయనతోకూడ సమాధి చేయబడితివి."

పరిశుద్ధాత్మ దానము

పాప క్షమాపణ పొందిన వెంటనే, దేవుడు తన పరిశుద్ధాత్మను విశ్వాసి హృదయంలో ముద్రగా ఉంచుతాడు. ఈ ఆత్మ మనలను సత్యములోనికి నడిపిస్తుంది, ప్రార్థించవలసిన విధానాన్ని నేర్పుతుంది మరియు దేవుడిని "అబ్బా, తండ్రీ!" అని పిలిచే దైవిక కుమారుడు/కుమార్తె హోదాను మనకు ప్రసాదిస్తుంది.

3. అవిశ్వాసము మరియు పరలోక మర్మములు

నికోదేము ఇశ్రాయేలీయులకు బోధకుడై ఉండి కూడా ఈ ప్రాథమిక ఆధ్యాత్మిక సత్యాన్ని గ్రహించలేకపోయాడు. అందుకే యేసుప్రభువు కొంచెం సున్నితమైన గద్దింపుతో, "నీవు యిస్రాయేలు బోధకుడవై యుండి దీనినేరుగవా?" అని ప్రశ్నించారు.

భూలోక విషయాలు - పరలోక విషయాలు

యేసుప్రభువు ఈ భూమిపై జీవిస్తూ, మనుషులకు అర్థమయ్యే ప్రకృతి దృష్టాంతాల (గాలి, విత్తనములు, గొర్రెలు) ద్వారా దేవుని రాజ్యాన్ని గూర్చి బోధించారు. వీటినే శాస్త్రులు, పరిసయ్యులు నమ్మలేకపోయినప్పుడు, ఇక పరలోకంలో జరిగే తండ్రి చిత్తాన్ని, దైవిక మర్మాలను వారు ఎలా నమ్మగలరు?

మనుష్య కుమారుని ప్రత్యేకత

యేసుక్రీస్తు కేవలం ఒక ప్రవక్త లేదా బోధకుడు మాత్రమే కాదు. ఆయన పరలోకము నుండి దిగివచ్చిన దైవకుమారుడు.

భూమిపై పుట్టిన ఏ మనుష్యుడూ పరలోకానికి వెళ్లి, అక్కడ సంగతులు చూసి వచ్చి భూమిపై బోధించలేదు.
కానీ యేసుప్రభువు ఆదినుండి తండ్రి యొద్ద ఉండి, మానవాళి రక్షణ నిమిత్తం శరీరధారిగా భూమికి దిగివచ్చారు. కాబట్టి, ఆయన ఇచ్చే సాక్ష్యము అత్యంత నమ్మదగినది, సత్యమైనది.

4. అరణ్యములో సర్పము - సిలువ యాగమునకు సాదృశ్యము

యేసుప్రభువు పాత నిబంధనలోని ఒక చారిత్రాత్మక సంఘటనను ఉదహరిస్తూ, తాను ఈ లోకంలో ఏ విధంగా రక్షణ కార్యాన్ని ముగించబోతున్నారో ప్రవచనాత్మకంగా వివరించారు.విశ్వాసము ద్వారా రక్షణ

విషసర్పము కాటు వేసినప్పుడు ఇశ్రాయేలీయులు ఆ విషానికి విరుగుడు కోసం ఏ మందులు వాడలేదు, ఏ స్వంత ప్రయత్నము చేయలేదు. వారు చేయవలసిందల్లా ఒక్కటే – మోషే ఎత్తిన కంచు సర్పము వైపు విశ్వాసముతో నిలకడగా చూడటం. అదేవిధంగా, పాపమనే సర్పము చేత కాటు వేయబడి, ఆధ్యాత్మిక మరణంలో ఉన్న మానవాళి రక్షించబడటానికి క్రీస్తు సిలువ వైపు విశ్వాసనేత్రంతో చూడాలి. సిలువపై కార్చబడిన రక్తం మన సమస్త పాపములను కడిగివేస్తుందని నమ్మడమే రక్షణకు ఏకైక మార్గం.

5. చీకటిని ప్రేమించుట మరియు వెలుగును ద్వేషించుట

యూదులు, ధర్మ శాస్త్ర బోధకులు యేసుప్రభువును ఎందుకు అంగీకరించలేదు అనే ప్రశ్నకు సమాధానాన్ని యోహాను సువార్త ఇక్కడ చాలా స్పష్టంగా ఇస్తుంది. దానికి కారణం మేధోసంబంధమైనది కాదు, అది నైతికపరమైనది .వెలుగుకు భయపడే నైజం

వెలుగు రూపాంతరంలోనికి వచ్చినప్పుడు గదిలో ఉన్న దుమ్ము, ధూళి, దాగి ఉన్న పురుగులు ఎలాగైతే స్పష్టంగా కనిపిస్తాయో, లోకపు వెలుగైన యేసుక్రీస్తు సన్నిధిలోకి వచ్చినప్పుడు మనుష్యుని అంతరంగంలోని కపటము, స్వార్థము, పాపపు తలంపులు బయటపడతాయి. యూదుల నాయకులు సమాజంలో తాము ఎంతో నీతిమంతులమని నటించేవారు. కానీ యేసుప్రభువు వారి హృదయాలను తెరిచి చూపించారు. తమ పాపపు జీవితాలు, అధికార కాంక్ష బయటపడిపోతాయనే భయంతోనే వారు వెలుగును ద్వేషించారు, చీకటినే ప్రేమించారు.

నికోదేము రాత్రివేళ రాకడ

నికోదేము కూడా ప్రారంభంలో యూదుల భయంతో, చీకటిలోనే (రాత్రివేళ) యేసుప్రభువు నొద్దకు వచ్చాడు. కానీ ఆయన యేసుప్రభువుతో మాట్లాడిన తర్వాత, ఆ వెలుగును తన హృదయంలోనికి ఆహ్వానించాడు. అందుకే యేసుప్రభువు మరణించిన తర్వాత, అందరూ భయపడి పారిపోయిన సమయంలో, నికోదేము ధైర్యంగా ముందుకు వచ్చి యేసుప్రభువు శరీరానికి సుగంధ ద్రవ్యాలు పూసి, ఆయనను ఘనంగా సమాధి చేయడానికి సహాయపడ్డాడు. చీకటిలో ప్రయాణం ప్రారంభించిన నికోదేము, వెలుగు యొక్క సంపూర్ణ సాక్షిగా మారిపోయాడు.

6. నిత్యజీవము: క్రీస్తు కేంద్రక నిరీక్షణ

యేసుప్రభువును విశ్వసించడం ద్వారా లభించే పరమావధి నిత్యజీవము . నిత్యజీవము అంటే కేవలం శారీరక మరణం తర్వాత వచ్చే జీవితం మాత్రమే కాదు, అది దేవునితో ఎడతెగని సహవాసము కలిగి ఉండే నూతన గుణాత్మక జీవితం.

నూతన సృష్టిగా మార్చబడిన జీవితం

ఆత్మ మూలముగా జన్మించిన వ్యక్తి పాత అలవాట్లను, లౌకిక ఆశలను విసర్జిస్తాడు. అంతవరకు పాపంలో ఆనందాన్ని వెతుక్కున్న హృదయం, ఇప్పుడు దేవుని వాక్యాన్ని ధ్యానించడంలో, ప్రార్థించడంలో, ఇతరులను ప్రేమించడంలో ఆనందాన్ని పొందుతుంది. ఈ మార్పు దైవికమైనది.

దేవుని వాక్యము పట్ల ఆకలి పెరుగుతుంది.
పాపము పట్ల అసహ్యము, పశ్చాత్తాపము కలుగుతాయి.
శత్రువులను సైతం క్షమించే దైవిక ప్రేమ హృదయంలో ఉదయిస్తుంది.

యేసుక్రీస్తు సిలువపై ఎత్తబడటం ద్వారా లోకానికి రక్షణ కరదీపంగా మారారు. ఆయనను విశ్వసించే ప్రతి ఒక్కరికీ ఈ అద్భుతమైన మార్పు, పాప విముక్తి, మరియు పరలోక రాజ్య వారసత్వం ఉచిత కృపగా లభిస్తాయి. నికోదేముకు లభించిన ఈ వెలుగు, నేడు క్రీస్తును విశ్వసించే ప్రతి విశ్వాసి జీవితంలోనూ ప్రకాశిస్తోంది.

ప్రార్దన : ప్రభువా , మీరు నికోదెముతో ఆయన మరల జన్మించాలి అని చెప్పి, తన జీవితంలో రక్షణ పొందుటకు తాను మారు మనసు పొందాలని, జ్ఞానస్నానం పొందాలని, తాను పవిత్రాత్మను పొందాలని తెలియపరుస్తున్నారు. నేను కూడా ప్రభువా! రక్షణ పొందుటకు, మారు మనసు పొంది, పవిత్రంగా ఉండే విధంగా ఆశీర్వదించండి. నేను జ్ఞానస్నానం పొందిన సమయంలో మీ పవిత్ర ఆత్మతో , పవిత్రంగా ఉన్నానో అదేవిధంగా పవిత్రంగా ఉండేలా నన్ను దీవించండి. మిమ్ములను నా జీవితంలోనికి ఆహ్వానించి, మిమ్ములను అంగీకరించి మీ వెలుగులో నడిచేలా నన్ను దీవించండి. నా పాపములో నేను ఆనందిచే స్థితి నుండి మీ అజ్ఞలను పాటించుటలో ఆనందం పొందేలా దీవించండి. ఎప్పుడు మీ యందు విశ్వాసం వుంచి మీరు వాగ్దానం చేసే ఆ నిత్య జీవం పొందేలా నన్ను ఆశీర్వదించండి. మిమ్ములను చూస్తూ, మీకు సాక్షం ఇచ్చేలా చేయండి. ఆమెన్

Fr. Amruth