పాపకారణమగుట దేవునికి అయిష్టం - మార్కు 9:41-50 ఆత్మీయ ధ్యానం

  

క్రీస్తు సంబంధీకులు: నిత్యజీవ మార్గంలో శిష్యుల ప్రయాణం

మార్కు 9:41-50

మిమ్ము క్రీస్తు సంబంధులుగా గుర్తించి, ఎవ్వడు మీకు నా పేరిట చెంబెడు నీళ్లు ఇచ్చునో వాడు తగిన ప్రతిఫలమును తప్పక పొందును అని మీతో నిశ్చయముగచెప్పుచున్నాను" అనెను. "నన్ను విశ్వసించు ఈ చిన్న వారిలో ఏ ఒక్కడైన పాపి అగుటకు కారకుడగుటకంటె, అట్టివాడు తన మెడకు పెద్ద తిరుగటిరాయి కట్టబడి సముద్రములో పడద్రోయబడుట వానికి మేలు. నీ చేయి నీకు పాపకారణమైనచో దానిని నరికి పారవేయుము. రెండు చేతులతో నిత్య నరకాగ్నిలోనికి పోవుటకంటె ఒక్క చేతితో నిత్యజీవము పొందుట మేలు. నీ కాలు నీకు పాపకారణమైనచో, దానిని నరికి పారవేయుము. రెండుకాళ్ళతో నరకాగ్నిలోనికి పోవుట కంటే ఒక్క కాలితో నిత్య జీవమున ప్రవేశించుట మేలు. నీ కనులు నీకుపాప కారణమైనచో దానిని పెరికి పారవేయుము. రెండుకన్నులతో నీవు నరకాగ్నిలోనికి పోవుటకంటె ఒక కంటితో దేవుని రాజ్యమున ప్రవేశించుట మేలు. నరకలోకమున పురుగు చావదు, అగ్ని చల్లారదు. ప్రతి ఒక్కనికి ఉప్పదనము అగ్ని వలన కలుగును. ఉప్పు మంచిదే కాని అది తన ఉప్పదనమును కోల్పోయిన, తిరిగి మీరు ఎట్లు దానిని సారవంతము చేయగలరు? కావున, మీరు ఉప్పదనమును కలిగి ఒకరితో ఒకరు  సమాధానముతో ఉండుడు" అనెను.  

పరిశుద్ధ గ్రంథంలో యేసు ప్రభువు బోధించిన ప్రతి మాట మానవాళిని రక్షణ మార్గంలో నడిపించడానికి ఉద్దేశించినదే. ఈనాటి సువిశేష భాగంలో ప్రభువు ఒక ముఖ్యమైన సత్యాన్ని మనకు గుర్తుచేస్తున్నారు: "మీరు క్రీస్తు సంబంధీకులని మీకు చెంబెడు నీళ్లు ఇచ్చువాడు తగిన ప్రతిఫలమును పొందును." ఈ మాటలు వినడానికి చాలా సాధారణంగా  అనిపించినప్పటికీ, వీటి వెనుక ఉన్న ఆధ్యాత్మిక భావం, బాధ్యత ఎంతో గొప్పవి. క్రీస్తు సంబంధికులుగా జీవించడం అంటే కేవలం నామమాత్రపు క్రైస్తవులుగా ఉండటం కాదు; అది క్రీస్తు ప్రేమను, ఆయన జీవన విధానాన్ని మన అనుదిన జీవితంలో ప్రతిబింబింపజేయడం.

1. ఎవరు ఈ క్రీస్తు సంబంధీకులు?

సువిశేష సందర్భాన్ని మనం పరిశీలిస్తే, మొదట క్రీస్తు సంబంధీకులు అంటే ఆయన చుట్టూ ఉన్న పన్నెండు మంది శిష్యులు లేదా ఆయనను వెంబడించిన అనుచరులు మాత్రమే అని మనకు అనిపించవచ్చు. కానీ, యేసు ప్రభువు పరిధి చాలా విశాలమైనది.

సంకుచిత భావాలకు అతీతంగా క్రీస్తు ప్రేమ

ఈ అధ్యాయంలోనే ఒక ఆసక్తికరమైన సంఘటన జరుగుతుంది. ప్రభువు పేరిట ఒక అపరిచిత వ్యక్తి దయ్యములను వెళ్లగొడుతుండటం శిష్యులు గమనిస్తారు. తమ వర్గమునకు  చెందనివాడు కనుక, వారు అతనిని వారించి, ఆ విషయాన్ని యేసు ప్రభువుకు చెబుతారు. అప్పుడు ప్రభువు వారిని గద్దిస్తూ, అతనిని వారించకుడి; మనకు విరోధి కానివాడు మన పక్షమున ఉన్నవాడే" అని సెలవిస్తారు.

దీనిని బట్టి మనకు ఏమి అర్థమవుతుంది? క్రీస్తు సంబంధం అనేది కేవలం ఒక సమూహానికో, సంస్థకో పరిమితమైనది కాదు. ఎవరైతే దేవుని నామ మహిమ కోసం, పొరుగువారి క్షేమం కోసం ప్రేమతో పనిచేస్తారో, వారందరినీ ప్రభువు తనవారిగానే గుర్తిస్తారు.

క్రీస్తుకు నిజమైన బంధువులు ఎవరు?

మరొక సందర్భంలో ప్రభువు స్పష్టంగా ప్రకటించారు: "పరలోకమందున్న నా తండ్రి చిత్తమును నెరవేర్చువాడే నా సోదరుడు, నా సోదరి, నా తల్లి." (మత్తయి 12:50). కాబట్టి, క్రీస్తు సంబంధీకులు కావడం అంటే:

• ఆయన వాక్యాన్ని కేవలం వినడం కాదు, దాని ప్రకారం జీవించడం.

• సమాజంలో క్రీస్తు ప్రేమను పంచే ప్రతినిధులుగా మారడం.

• ప్రభువు ఆజ్ఞలను పాటిస్తూ, తండ్రి చిత్తానికి మన జీవితాలను అంకితం చేయడం.

నేడు మనం కూడా ఆయన మాటలను అనుసరించి జీవించినప్పుడే, నిజమైన క్రీస్తు సంబంధీకులముగా, ఆయన కుటుంబ సభ్యులముగా మారుతాము.

2. క్రీస్తు సంబంధీకులను గౌరవించడం మరియు  ప్రతిఫలం

క్రీస్తు సంబంధీకులను గౌరవించడం అంటే స్వయంగా క్రీస్తును గౌరవించడమే. ఎందుకంటే, ఒక నిజమైన క్రైస్తవుని ద్వారా, వారి మాటల ద్వారా, వారి ప్రేమపూర్వకమైన సాక్ష్య జీవితం ద్వారా లోకానికి క్రీస్తు ప్రకటించబడుతున్నాడు.

"మిమ్మును అంగీకరించువాడు నన్ను అంగీకరించును; నన్ను అంగీకరించువాడు నన్ను పంపినవానిని అంగీకరించును." — మత్తయి 10:40

దేవుని సేవకులకు లేదా విశ్వాసులకు చిన్న సహాయం చేసిన, అది కేవలం ఒక చెంబెడు నీళ్లు ఇవ్వడం వంటి చిన్న కార్యమైన దేవుడు దానిని మరచిపోడు. ఆ చిన్న త్యాగానికి కూడా పరలోకంలో తగిన ప్రతిఫలం ఉంటుంది. మన జీవితాలు ఇతరులకు క్రీస్తును చూపించే అద్దాలుగా ఉండాలి.

3. పాపం, నరకం: ఒక గంభీరమైన హెచ్చరిక

సువిశేషంలో యేసు ప్రభువు కేవలం బహుమతుల గురించి మాత్రమే మాట్లాడలేదు, పాపం వల్ల వచ్చే భయంకరమైన పరిణామాల గురించి కూడా అంతే తీవ్రంగా హెచ్చరించారు. నరకం అనేది ఒక ఊహాజనితమైన కథ కాదు; అది దేవుని ఉనికి లేని అత్యంత ఘోరమైన వేదన భరితమైన స్థితి.

నరకం అంటే ఏమిటి?

నరకము అనేది దేవుని ప్రేమాపూర్వకమైన పిలుపును నిరంతరం తిరస్కరించి, ఆయనకు వ్యతిరేకమైన పాపకార్యాలు చేస్తూ, జీవితాంతం పశ్చాత్తాప పడకుండా పాపములోనే మరణించేవారు పొందే నిత్య శిక్షా స్థితి.

• నిత్య వేదన: అక్కడ ఊరట లేదా శాంతి అనేదే ఉండదు. నిరంతరం తపన, బాధ మాత్రమే ఉంటాయి.

• దేవునికి దూరం కావడం: దేవుని వెలుగుకు, ప్రేమకు పూర్తిగా దూరమవ్వడమే అసలైన నరకం.

ప్రభువు ప్రేమమయుడు కాబట్టి, తన బిడ్డలైన మనలో ఎవ్వరూ ఆ భయంకరమైన స్థితికి వెళ్లడం ఆయనకు ఇష్టం లేదు. అందుకే ఆయన మనల్ని ముందుగానే హెచ్చరిస్తూ, పాపానికి దూరంగా ఉండమని కోరుకుంటున్నారు.

4. పాపనికి  కారణము కాకూడదు

యేసు ప్రభువు ఈ భాగంలో తీవ్రమైన పదజాలాన్ని ఉపయోగించారు: "నీ చేయి నీకు పాపకారణమైనచో దానిని నరికి పారవేయుము. రెండు చేతులతో నిత్య నరకాగ్నిలోనికి పోవుటకంటె ఒక్క చేతితో నిత్యజీవము పొందుట మేలు."

దీని అర్థం శారీరక అవయవాలను నరుక్కోవడం కాదు. ఇది ఒక రూపక అలంకారం (Metaphor). పాపానికి కారణమయ్యే విషయాల పట్ల మనం ఎంత కఠినంగా, రాజీలేని వైఖరితో ఉండాలో ప్రభువు ఇక్కడ వివరిస్తున్నారు.

ఇతరులకు అభ్యంతరకారణం కాకూడదు

మనం పాపం చేయడమే కాకుండా, మన ప్రవర్తన వల్ల ఇతరులు లేదా విశ్వాసంలో చిన్నవారైన వారు పాపంలో పడటానికి మనం కారణం కాకూడదు. ఒకవేళ మన వల్ల ఎవరైనా పాపంలో పడితే, దానికంటే మెడకు తిరగలి రాయి కట్టబడి సముద్రంలో మునిగిపోవడం మేలని ప్రభువు అంటున్నారు. ఇది ఇతరుల ఆత్మీయ ఎదుగుదలకు మనం ఎంత బాధ్యత వహించాలో గుర్తుచేస్తుంది.

ప్రాణాధారమైనదైనా వదులుకోవడానికి సిద్ధపడాలి

మన జీవితంలో ఏదైనా అలవాటు, స్నేహం, ఆస్తి, లేదా బలహీనత మనల్ని దేవునికి దూరం చేస్తూ, పాపానికి కారణమవుతుంటే అది మన కన్ను లేదా చెయ్యి ఎంత ముఖ్యమైనదైనప్పటికీ దానిని మన జీవితం నుండి పూర్తిగా తొలగించుకోవడానికి సిద్ధపడాలి. అవయవాలు ఉండి నరకానికి పోవడం కంటే, అవయవాలు లేకపోయినా నిత్యజీవంలో ప్రవేశించడం ఎంతో శ్రేయస్కరం.

5. నిత్యజీవం: అమూల్యమైన దేవుని వరం

మనం పాపాన్ని ఎందుకు విడిచిపెట్టాలి? ఎందుకంటే మన ముందు ఉన్న బహుమతి "నిత్యజీవం". నిత్యజీవం అనేది ఈ లోకంలో మనం సంపాదించే ఏ ఆస్తిపాస్తులతోనూ, వెండిబంగారాలతోనూ కొనలేనిది.

నిత్యజీవం యొక్క ప్రత్యేకత:

1. దేవుని ఉచిత బహుమతి: ఇది మనిషి తన సొంత ప్రతిభ వల్ల లేదా సంపాదన వల్ల సాధించేది కాదు. ఇది మంచి జీవితం జీవించే వారికి దేవుడు ఇచ్చే పరమ బహుమతి.

2. దేవుని ముఖాముఖి దర్శనం: నిత్యజీవం అంటే పరలోకంలో దేవుని మహిమను ముఖాముఖిగా వీక్షించడం.

3. పరిపూర్ణ ఆనందం: అక్కడ ఏడ్పు గాని, దుఃఖం గాని, వ్యాధి గాని ఉండవు. అది ఎల్లప్పుడూ ఆనందంగా ఉండే ఒక దివ్య స్థితి.

పశ్చాత్తాపానికి ఉన్న శక్తి

దేవుడు ఎంత న్యాయవంతుడో, అంతకంటే మిన్నగా కరుణామయుడు. ఒక వ్యక్తి ఎంతటి ఘోరమైన పాపాలు చేసినప్పటికీ, మరణించక ముందే తన తప్పులను తెలుసుకొని, హృదయపూర్వకంగా పశ్చాత్తాపపడి, ప్రభువు పాదాల చెంత క్షమాపణ వేడుకుంటే, ప్రభువు వారిని క్షమిస్తాడు. వారికి కూడా నిత్యజీవ భాగ్యాన్ని అనుగ్రహిస్తాడు. కాబట్టి, నిత్యజీవాన్ని పొందడానికి మనం నిరంతరం ఆత్మీయ సాధన చేయాలి. మనలోని లోపాలను సరిదిద్దుకోవాలి.

క్రీస్తు సంబంధీకులుగా జీవించడం ఒక గొప్ప భాగ్యం, అదే సమయంలో అది ఒక పవిత్రమైన బాధ్యత. మన అనుదిన జీవితంలో మన మాటల ద్వారా, చేతల ద్వారా ఇతరులకు అభ్యంతరకరంగా మారకుండా, క్రీస్తు సువాసనను వెదజల్లాలి. లోక ఆశలు, పాపపు ఆకర్షణలు మనల్ని నరక మార్గం వైపు లాగుతున్నప్పుడు, వాటన్నింటినీ తెగనరుక్కొని నిత్యజీవం వైపు అడుగులు వేయాలి. మన జీవితాలే క్రీస్తుకు సజీవ సాక్ష్యాలు కావాలి.

ప్రార్థన

ఓ దయామయుడైన యేసు ప్రభువా! మీ అనుచరులమైన మేము ఎల్లప్పుడూ మిమ్ములను మాత్రమే మా జీవితాలకు ఆదర్శంగా తీసుకోవాలని, మీ వలె పరిశుద్ధంగా జీవించాలని కోరుకుంటున్నాము. మీ నామమున జీవించే మీ సంబంధీకులను, సేవకులను గౌరవించిన వారికి మీరు ఇచ్చే ప్రతిఫలము ఎంతో గొప్పదని గ్రహించాము.

ప్రభువా, మీ అనుచరులుగా, మీకు చెందినవారముగా ఉండే ఈ గొప్ప ధన్యతను మాకు ప్రసాదించినందుకు వందనాలు. మా దైనందిన జీవితాల ద్వారా, మా ప్రేమపూర్వక ప్రవర్తన ద్వారా మిమ్ములను ఇతరులకు చూపించే భాగ్యాన్ని, మీ వాక్యాన్ని వినిపించే అనుగ్రహాన్ని మాకు దయచేయండి. ఈ అవకాశాన్ని మేము సద్వినియోగ పరచుకొనేలా దీవించండి.

మమ్ములను పాపంలోకి నెట్టే ఏ చెడుమార్గంలోనూ ప్రయాణించకుండా, మీ నీతి మార్గంలో నడిపించండి. మా హృదయాలలో, మా జీవితాలలో ఏదైనా పాపకారణమైన బలహీనత లేదా అభ్యంతరం ఉన్నచో, దానిని పూర్తిగా మా నుండి తీసివేయడానికి కావలసిన ఆత్మస్థైర్యాన్ని ఇవ్వండి. మీ వలె జీవిస్తూ, చివరి శ్వాస వరకు మీకు నమ్మకంగా ఉంటూ, ఆ నిత్యజీవానికి వారసులము అయ్యేలా మమ్ములను ఆశీర్వదించండి. ఈ ప్రార్థనను మా ప్రభువైన క్రీస్తు ద్వారా అడుగుచున్నాము పరమ తండ్రి.

ఆమేన్.

📚 ఈ సందేశం మీకు ఆశీర్వాదకరంగా అనిపించిందా?
మీ కుటుంబం & స్నేహితులతో share చేయండి! 🙏

WhatsApp లో Share చేయండి రోజువారీ సందేశాలకు 👉 కార్మెల్ శోభ WhatsApp Channel Join చేయండి