నిజమైన దేవుని సాన్నిధ్యం: లూకా 21:5-11 | కార్మెల్ శోభ

లూకా 21:5-11

కొందరు ప్రజలు ఆలయమును గురించి ప్రస్తావించుచు "చక్కని రాళ్లతోను , దేవునికి అర్పింపబడిన వస్తువులతోను ఎంత అందముగా శోభిల్లుచున్నదో చూడుడు"అని చెప్పుకొనుచుండిరి. అంతట యేసు వారితో "ఈ కట్టడమును మీరు చూచుచున్నారుగదా! ఇచ్చట రాతిపై రాయి నిలువని కాలము వచ్చును. అంతయు నాశనము చేయబడును"అనెను. అపుడు వారు "బోధకుడా! ఇవన్నియు ఎప్పుడు సంభవించును? దానికి సూచనయేమి?" అని అడిగిరి. అందుకు, అయన "మిమ్ము ఎవ్వరును మోసగింపకుండునట్లు మెలుకువగా ఉండుడు. మోసపోకుడు. అనేకులు నా పేరిట వచ్చి నేనే ఆయనను అనియు, కాలము సమీపించినది అనియు చెప్పెదరు. కాని, మీరు వారివెంట వెళ్ళవలదు. యుద్ధములను, విప్లవములను గూర్చి వినినప్పుడు మీరు భయపడవలదు. మొదట ఇవి అన్నియు జరిగితీరును. కాని, అంతలోనే అంతము రాదు." ఇంకను అయన వారితో ఇట్లనెను:"ఒక జాతి మరియొక జాతిపై, ఒక రాజ్యము మరియొక రాజ్యముపై దాడి చేయును. భయంకర భూకంపములు, పలుచోట్ల కరువులు, తెగుళ్లు వ్యాపించును. ఆకాశమున భయంకరమైన దృశ్యములు, గొప్ప సూచనలు కనిపించును.

బాహ్య సౌందర్యం - అంతరంగిక సత్యం

యెరూషలేము దేవాలయం కేవలం ఒక రాతి కట్టడం కాదు; అది యూదా జాతి అస్తిత్వానికి, వారి సంస్కృతికి మరియు శతాబ్దాల నాటి వారి ఆధ్యాత్మిక వైభవానికి సజీవ ప్రతీక. మహాభక్తుడైన దావీదు రాజు కన్న కల, సొలొమోను మహారాజు నిర్మించిన అద్భుతం, ఆ తర్వాత హేరోదు రాజు కాలంలో మరింత అందంగా తీర్చిదిద్దబడిన మహాసౌధమది. ఆ తెల్లని పాలరాళ్లు, సువర్ణ కాంతులు, ప్రజలు భక్తితో సమర్పించిన అమూల్యమైన కానుకలు ఆ కట్టడానికి ఒక దివ్యమైన శోభను చేకూర్చాయి. ఇస్రాయేలు ప్రజలు ఆ భౌతిక కట్టడం వైపు చూస్తూ మురిసిపోయేవారు. వారి గర్వానికి, వారి భద్రతాభావానికి ఆ ఆలయమే కేంద్రబిందువు. "ఇది దేవుని ఇల్లు, ఇక్కడ సర్వోన్నతుడు నివసిస్తున్నాడు, కాబట్టి ఈ కట్టడానికి గానీ, మాకు గానీ ఎన్నటికీ ఎటువంటి ముప్పూ వాటిల్లదు" అనే ఒక గుడ్డి నమ్మకంలో వారు జీవించారు.

కాని మానవుడు పైరూపాన్ని చూస్తాడు, దేవుడు హృదయాన్ని చూస్తాడు. ఇస్రాయేలు ప్రజలు ఆలయం యొక్క వెలుపలి అందాన్ని చూసి గర్విస్తున్నారే తప్ప, ఆ ఆలయం ఎవరికైతే ప్రతిష్ఠించబడిందో, ఆ దేవుని చిత్తాన్ని వారు మరచిపోయారు. భౌతికమైన రాళ్లు, బంగారం దేవునికి ఆనందాన్ని ఇవ్వవు. హృదయంలో ఉండవలసిన పవిత్రత, నీతి, న్యాయం లోపించినప్పుడు, ఎంతటి ఘనమైన కట్టడమైనా దేవుని దృష్టిలో అది కేవలం ఒక శూన్యమైన కట్టడమే అవుతుంది. దేవుడు నివసించేది చేతులతో కట్టిన ఆలయాలలో కాదు, విరిగి నలిగిన హృదయాలలో అనే సత్యాన్ని వారు గ్రహించలేకపోయారు.

చారిత్రక హెచ్చరిక: షిలో అనుభవం

దేవుని సాన్నిధ్యం కేవలం ఒక స్థలానికో లేదా ఒక భౌతిక కట్టడానికో పరిమితం కాదు అని నిరూపించడానికి ఇస్రాయేలు చరిత్రలో ఒక గొప్ప ఉదాహరణ ఉంది. పూర్వ కాలంలో, మోషే అరణ్యంలో నిర్మించిన ప్రత్యక్షపు గుడారాన్ని, దేవుని నిబంధన మందసాన్ని మొదట "షిలో" అనే ప్రాంతంలో ఉంచారు. ఆ రోజుల్లో షిలోహు ఇస్రాయేలీయుల ఆరాధనకు, దేవుని సాన్నిధ్యానికి ప్రధాన కేంద్రంగా విరాసిల్లింది. దేవుని కృప వల్ల ఆ ప్రజలు అన్ని రంగాలలో వృద్ధి చెందారు, శత్రువులపై విజయం సాధించారు. అయితే, కాలక్రమేణా వారు దేవుని ఆజ్ఞలను అతిక్రమించారు. యాజకులు సైతం అవినీతికి, పాపానికి ఒడిగట్టారు. దేవుని సాన్నిధ్యం తమతోనే ఉంటుందనే గర్వంతో, వారు ఇష్టానుసారంగా జీవించారు.

ఫలితంగా, దేవుడు షిలో నుండి తన మహిమను, సాన్నిధ్యాన్ని ఉపసంహరించుకున్నాడు. ఫిలిష్తీయుల చేతిలో ఇస్రాయేలీయులు ఓడిపోవడమే కాక, దేవుని మందసం కూడా శత్రువుల పరమైంది. షిలోహు నివాస స్థలాన్ని దేవుడు ఎలా విడనాడాడో యిర్మీయా ప్రవక్త ద్వారా దేవుడు యెరూషలేము ప్రజలను హెచ్చరించాడు:

"నేను మొదట నా నామమును ఉంచిన షిలోహునందలి నా స్థలమునకు పోయి, నా ప్రజలైన ఇశ్రాయేలీయుల చెడుతనమునుబట్టి నేను దానికి చేసినదానిని చూడుడి... మీరు నమ్ముకొనియున్న ఈ మందిరమునకు నేను షిలోహునకు చేసినట్లు చేసెదను" (యిర్మీయా 7:12-14).

యెరూషలేము ప్రజలు ఈ చారిత్రక సత్యాన్ని మరచిపోయారు. షిలోహుకు పట్టిన గతే తమ ఆలయానికి కూడా పడుతుందని వారు కలలో కూడా ఊహించలేదు. దేవునితో సరైన సంబంధం లేకుండా, కేవలం ఆచారయుక్తమైన భక్తితో దేవుడిని తృప్తి పరచవచ్చని వారు భ్రమపడ్డారు.

నిజమైన ఆరాధన లోపించినప్పుడు దేవుని తీర్పు

యేసు ప్రభువు కాలంలో యెరూషలేము దేవాలయం ఒక వ్యాపార కేంద్రంగా, దొంగల గుహగా మారిపోయింది. బలహీనులను దోచుకోవడం, భక్తిని ఒక లాభసాధనంగా మార్చుకోవడం ఆలయ ప్రాంగణంలో నిత్యకృత్యమైంది. బాహ్యంగా సుందరమైన రాళ్లతో మెరిసిపోతున్న ఆ ఆలయం అంతరంగంలో ఆధ్యాత్మికంగా కుళ్ళిపోయింది. అందుకే యేసు ప్రభువు ఆ కట్టడం వైపు చూసి, "ఇచ్చట రాతిపై రాయి నిలువని కాలము వచ్చును" అని ప్రవచించారు. దేవుడు ప్రేమ స్వరూపుడే అయినప్పటికీ, ఆయన పరిశుద్ధుడు మరియు న్యాయతీర్పు తీర్చువాడు. తన నామానికి అవమానం తెచ్చే ఏ కట్టడాన్ని అయినా, ఎంతటి ప్రియమైన ప్రజలనైనా ఆయన శిక్షించక మానడు.

క్రీ.శ. 70వ సంవత్సరంలో రోమన్ సైన్యాలు తీతు (Titus) నాయకత్వంలో యెరూషలేముపై దాడి చేసినప్పుడు యేసు చెప్పిన మాట అక్షరాలా నెరవేరింది. రోమన్ సైనికులు ఆలయానికి నిప్పు పెట్టారు. ఆలయ గోడలకు, రాళ్లకు పూసిన బంగారం కరిగి రాళ్ల సందుల్లోకి వెళ్ళిపోవడంతో, ఆ బంగారాన్ని తీసుకోవడం కోసం సైనికులు ప్రతి రాయిని పెకిలించి వేశారు. అలా "రాతిపై రాయి నిలువకుండా" ఆలయం పూర్తిగా నాశనమైంది. ప్రజలు దేవునికి వ్యతిరేకంగా జీవించినప్పుడు, దేవుడు వారిని కాపాడటానికి బదులు, వారి గర్వాన్ని అణచివేయడానికి ఆ ఆలయ నాశనాన్నే అనుమతించారు.

భౌతిక ఆలయం నుండి ఆత్మ సంబంధమైన ఆలయానికి మార్పు

భౌతికమైన యెరూషలేము ఆలయం నాశనమవడమనేది కేవలం ఒక భౌతిక నష్టమే కాదు, అది పాత నిబంధన ఆరాధనా పద్ధతి ముగింపునకు మరియు కొత్త నిబంధన ఆరంభానికి సూచన. దేవుడు మానవాళిని శాశ్వతంగా విడిచిపెట్టాలని అనుకోలేదు. అందుకే ఆయన తన ఏకైక కుమారుడైన యేసుక్రీస్తును ఈ లోకానికి పంపాడు. యేసుక్రీస్తు రాకతో దేవుని సాన్నిధ్యాన్ని పొందే మార్గం పూర్తిగా మారిపోయింది.

ఇకపై దేవునిని ఆరాధించడానికి ఒక నిర్దిష్టమైన ఊరికో, కొండకో లేదా రాతి కట్టడానికో వెళ్లవలసిన అవసరం లేదు. యేసు ప్రభువు సమరయ స్త్రీతో మాట్లాడినప్పుడు ఈ పరమార్థాన్ని స్పష్టం చేశారు:

"కాలము వచ్చుచున్నది, ఆ కాలమందు ఈ పర్వతముమీదనైనను యెరూషలేములోనైనను మీరు తండ్రిని ఆరాధింపరు... యథార్థముగా ఆరాధించువారు ఆత్మతోను సత్యముతోను తండ్రిని ఆరాధించు కాలము వచ్చుచున్నది" (యోహాను 4:21-23).

యేసుక్రీస్తు తానే నిజమైన ఆలయముగా ఈ లోకంలో జీవించారు. ఆయన శరీరం అనే ఆలయం సిలువపై విరవబడటం ద్వారా, పునరుత్థానమవ్వడం ద్వారా, ప్రతి మనిషి నేరుగా దేవుని సన్నిధికి చేరుకునే భాగ్యం కలిగింది. ఇప్పుడు క్రీస్తును విశ్వసించే ప్రతి వ్యక్తి హృదయమే పరిశుద్ధాత్మ నివసించే ఆలయముగా మార్చబడింది. భౌతిక కట్టడం నాశనమైనా, యేసుక్రీస్తులో లభించే దేవుని సాన్నిధ్యం ఎన్నటికీ నాశనం కానిది.

హెచ్చరిక: క్రీస్తు పేరిట వచ్చే అబద్ధ ప్రవక్తలు - కపటత్వం

యేసు ప్రభువు ఆలయ నాశనాన్ని గూర్చి చెప్పినప్పుడు, శిష్యులలో భయాందోళనలు మొదలయ్యాయి. లోక అంతానికి, ఆ భయంకరమైన రోజులకు సూచనలు ఏమిటని వారు ప్రశ్నించారు. అందుకు యేసు ఇచ్చిన మొదటి మరియు అతి ముఖ్యమైన హెచ్చరిక: "మిమ్ము ఎవ్వరును మోసగింపకుండునట్లు మెలుకువగా ఉండుడు."

ప్రపంచంలో యుద్ధాలు, కరువులు, భూకంపాలు సంభవించినప్పుడు మానసికంగా ప్రజలు బలహీనపడతారు. ఆ సమయంలో ఆశ్రయం కోసం, రక్షణ కోసం చూస్తుంటారు. ఈ బలహీనతను అపవాది (సాతాను) ఆసరాగా చేసుకుంటాడు. అంత్యదినములలో అనేకమంది అబద్ధ క్రీస్తులు, అబద్ధ ప్రవక్తలు వచ్చి, "నేనే క్రీస్తును, నా ద్వారానే మీకు ముక్తి, రక్షణ" అని చెప్తూ అద్భుతాలు, సూచనలు చూపిస్తూ మోసగిస్తారని యేసు ముందే చెప్పారు.

నిజమైన అనుచరునికి, అబద్ధ బోధకునికి గల వ్యత్యాసం

ఈ రోజుల్లో కూడా సమాజంలో ఆధ్యాత్మికత పేరిట అనేక మోసాలు జరుగుతున్నాయి. యేసు ప్రభువు పేరు చెప్పుకొని, తమ స్వంత లాభాల కోసం, కీర్తి ప్రతిష్టల కోసం ప్రాకులాడే బోధకులు ఎందరో ఉన్నారు. నిజమైన క్రీస్తు అనుచరుడిని, అబద్ధ బోధకుడిని గుర్తించడం ఎలా?నిజమైన దైవజనులు ఎన్నటికీ తామే దేవుళ్లమని గానీ, తమ వల్లే అంతా జరుగుతుందని గానీ చెప్పుకోరు. బాప్తిస్మమిచ్చు యోహాను వలె, "ఆయన హెచ్చవలసియున్నది, నేను తగ్గవలసియున్నది" (యోహాను 3:30) అనే మనస్తత్వాన్ని కలిగి ఉంటారు. వారు తమ జీవితాంతం క్రీస్తు అడుగుజాడల్లో నడవడానికి వినయపూర్వకంగా ప్రయత్నిస్తూనే ఉంటారు.

కాని అబద్ధీకులు తమ కపటత్వాన్ని ఎక్కువ కాలం దాచలేరు. డాంభికం, నటన కొంతకాలం వరకే సాగుతాయి. శోధనలు, పరీక్షలు ఎదురైనప్పుడు వారి అసలు స్వరూపం, కపటత్వం బయటపడిపోతాయి. వారు దేవుని సాన్నిధ్యాన్ని వ్యాపారంగా మార్చి, ప్రజల భయాన్ని పెట్టుబడిగా పెట్టుకుంటారు. అటువంటి వారిని చూసి మోసపోవద్దని, వాక్య జ్ఞానముతో, ఆత్మ వివేచనతో మెలుకువగా ఉండాలని ప్రభువు హెచ్చరిస్తున్నారు.

అంత్యదినముల సూచనలు మరియు విశ్వాసి బాధ్యత

యేసు ప్రభువు కేవలం ఆధ్యాత్మిక మోసాల గురించే కాక, ప్రకృతిలోనూ, సమాజంలోనూ వచ్చే మార్పులను కూడా ప్రస్తావించారు. దేశాల మధ్య యుద్ధాలు, విప్లవాలు, భయంకరమైన భూకంపాలు, కరువులు, అంటువ్యాధులు (తెగుళ్లు) సంభవిస్తాయని చెప్పారు. ఇవన్నీ విన్నప్పుడు భయపడకూడదు, ఎందుకంటే ఇవన్నీ అంతానికి ఆరంభ సూచనలు మాత్రమే.

ఈ సూచనలు మనల్ని భయపెట్టడానికి కాదు, మన ఆధ్యాత్మిక స్థితిని పరీక్షించుకోవడానికి ఇవ్వబడ్డాయి. భౌతికమైన లోకం, దాని అందాలు, ఐశ్వర్యాలు ఎల్లకాలం నిలిచేవి కావు. ఒకనాడు యెరూషలేము దేవాలయం ఎలా కూలిపోయిందో, ఈ లోక వైభవం కూడా అలాగే అంతమైపోతుంది. కాబట్టి, నశించిపోయే వాటి మీద కాకుండా, నిరంతరము నిలిచే దేవుని రాజ్యం మీద, ఆయన నీతి మీద మనం మనస్సు ఉంచాలి. అనుదిన జీవితంలో యేసుక్రీస్తు చూపిన ప్రేమ, క్షమ, పవిత్రతలను అలవరచుకుంటూ, ఆయన వలె సంపూర్ణంగా మారడానికి మనం నిరంతరం ప్రయత్నిస్తూనే ఉండాలి.

ప్రార్ధన: సర్వ సృష్టికి కారకుడవైన ప్రభువా , మీరు ఇచ్చిన తెలివి , జ్ఞానము చేత మేము ఈ ప్రకృతిని, లోకమును సుందరముగా తీర్చి దిద్దుతున్నాము. వాటిని మా గొప్పతమునుగా భావిస్తూ, మీ అవసరం మాకు లేదు అన్నట్లు జీవిస్తున్నాము. అటువంటి పనులు చేస్తున్నందుకు మమ్ము క్షమించమని వేడుకుంటున్నాము. ప్రభువా మేము మీమమ్ములను కాదని ఈ లోకమును ఈ లోక వస్తువులను ప్రేమిస్తూ అవే ముఖ్యం అని జీవిస్తున్నందుకు మమ్ములను మన్నించండి. ప్రభువా మాకు ఏది సత్యమో , ఏది అసత్యమో తెలియక మేము అనేక మంది చేత చెడు మార్గాలలో నడిపించబడుతున్నాము. అటువంటి సందర్భంలో మాకు సత్యాన్ని తెలియచేసి మిమ్ములను అనుసరించేలా చేయండి. ప్రభువా దేవాలయం లేకపోయినా మీ ద్వారా ప్రజలు దేవుని కనుగొన్నారు, మీద్వారా తండ్రిని చేరుకున్నారు. మీరు ఎలా దేవాలయం చేసే పనిని మీరు మీ జీవితం ద్వారా చేస్తున్నారో, మేము కూడా ముందు మిమ్ములను అనుసరిస్తూ , తండ్రిసాన్నిధ్యాన్ని పొందే అనుగ్రహం దయచేయండి