లూకా 13:31-35 వ్యాఖ్యానం: యెరూషలేముపై యేసు ప్రభువుని విలాపం
లూకా 13:31-35
ఆ క్షణమున కొందరు
పరిసయ్యులు వచ్చి యేసుతో “మీరు ఇక్కడనుండి వెళ్ళిపొండు. ఏలయన, హేరోదు మిమ్ములను
చంపచూచుచున్నాడు” అని చెప్పిరి. ఆయన వారితో “మీరు వెళ్ళి ఆ నక్కతో ఇట్లని
చెప్పుడు: 'నేను నేడు, రేపు దయ్యములను పారద్రోలెదను, రోగులను స్వస్థపరచెదను, మూడవ దినమున నా
పని పూర్తిచేసెదను. నేడు, రేపు, మరునాడు నేను నాపనిని కొనసాగింపవలయును. ఏలయన, ప్రవక్త
యెరూషలేమునకు వెలుపల చంపబడుట సంభవింపరాదు' అని చెప్పెను. “ఓ యెరూషలేమా! యెరూషలేమా! నీవు ప్రవక్తలను
చంపి దేవుడు పంపిన ప్రతినిధులపై రాళ్ళు రువ్వుచున్నావు. కోడి రెక్కలను చాపి తన
పిల్లలను కాపాడుకొనునట్లు నేను ఎన్ని పర్యాయములు నీ బిడ్డలను చేరదీయ గోరినను, నీవు
అంగీకరింపకపోయితివి. ఇదిగో నీ గృహము నిర్మానుష్యమగును. 'ప్రభువు పేరిట వచ్చువాడు
స్తుతింపబడునుగాక!' అని చెప్పువరకు మీరు నన్ను చూడజాలరు అని మీతో చెప్పుచున్నాను” అని
పలికెను.
ఈ ఐదు వచనాలలో యేసు ప్రభువు హృదయం మొత్తం కనిపిస్తుంది. ఆయనలో ఒకవైపు రాజుకు భయపడని ప్రవక్త ధైర్యం ఉంది. మరోవైపు తిరస్కరించిన నగరం కోసం కన్నీరు కార్చే తల్లి హృదయం ఉంది. హేరోదుతో మాట్లాడేటప్పుడు ఆయన స్వరం ఘాటుగా ఉంటుంది. యెరూషలేముతో మాట్లాడేటప్పుడు అది మృదువుగా, ఆవేదనతో నిండి ఉంటుంది. ఈ రెండూ వేర్వేరు స్వభావాలు కావు, ఒకే ప్రేమ రెండు రూపాల్లో వ్యక్తమైంది.
సందర్భం
లూకా 9:51లో ఆయన యెరూషలేమునకు వెళ్ళుటకు నిశ్చయించుకున్నాడు. అక్కడి నుండి 19వ అధ్యాయం 28వ వచనం వరకు సాగే
భాగాన్ని "యెరూషలేము ప్రయాణం" అంటారు. ఈ ప్రయాణంలో యేసు ప్రభువు చెప్పే ప్రతి బోధ, చేసే ప్రతి
స్వస్థత శిలువ వైపు నడిపించే అడుగే.
ఈ భాగానికి ముందు యేసు ప్రభువు ఇరుకు ద్వారం గురించి బోధించాడు (13:22-30). దేవుని రాజ్యంలో
ప్రవేశం బాహ్య సాన్నిహిత్యం వల్ల కాక, పశ్చాత్తాపం, విశ్వాసంతో
కూడిన స్పందన వల్ల దొరుకుతుంది అనే విషయం ఇక్కడ స్పష్టం అవుతుంది. దేవునికి అత్యంత
దగ్గరగా ఉన్న యెరూషలేమే ఆ సత్యాన్ని ఎలా తిరస్కరిస్తుందో ఈ భాగం చూపిస్తుంది.
పరిసయ్యుల హెచ్చరిక
"ఆ క్షణమున" కొందరు
పరిసయ్యులు వచ్చి, "ఇక్కడనుండి వెళ్ళిపొండు, హేరోదు
మిమ్ములను చంపచూచుచున్నాడు" అన్నారు. సువిశేషాలలో పరిసయ్యులు సాధారణంగా యేసు ప్రభువును
ప్రశ్నించేవారిగా కనిపిస్తారు. కాబట్టి వారు నిజంగా ఆయన క్షేమం కోరారా, లేక హేరోదు
కోసం ఆయనను గలిలయ నుండి పంపివేయాలనుకున్నారా అనేది తెలియదు.
హేరోదు అంతియోప గలిలయ, పెరయా
ప్రాంతాల సామంత పాలకుడు. అతడు బాప్తిస్మ యోహానును బంధించి, శిరచ్ఛేదం చేయించాడు (3:19-20;
9:9). కనుక ఈ బెదిరింపును తేలికగా
తీసుకోలేము.
"ఇక్కడనుండి వెళ్ళిపొండు"
అనేది సులభమైన సలహా. పారిపోతే ప్రాణం దక్కుతుందని లోకం చెబుతుంది. అరణ్యంలో సాతాను
పెట్టిన శోధనల్లాగే ఇదీ శిలువ లేని మార్గాన్ని చూపుతుంది (4:1-13). సత్యం కోసం
నిలబడేవారికి ఇలాంటి "శ్రేయోభిలాషుల" సలహాలు ఎప్పుడూ వస్తూనే ఉంటాయి.
"ఆ నక్కతో చెప్పుడు"
యేసు ప్రభువు హేరోదును "నక్క" అన్నాడు. యూదు
సంప్రదాయంలో ఈ మాటకు మూడు వివరాలు ఉన్నాయి.
- కపటం: నక్క జిత్తులమారి జంతువు.
- అల్పత్వం: సింహం గొప్పతనానికి గుర్తైతే నక్క అల్పత్వానికి గుర్తు. హేరోదు తనను
రాజుగా భావించినా, నిజానికి రోమా చక్రవర్తి
కింద ఒక సామంతుడు మాత్రమే.
- విధ్వంసం: నక్కలు ద్రాక్షతోటలను పాడుచేస్తాయి (పరమగీతం 2:15).
ఇది ద్వేషంతో పలికిన తిట్టు కాదు. ప్రవక్తలు
అధికారులకు నిజం చెప్పే పద్ధతి ఇదే. ఏలీయా అహాబుకు, నాతాను
దావీదుకు ఇలాగే నిజం చెప్పారు. యేసు ప్రభువు తన సందేశాన్ని హేరోదుకు నేరుగా కాక, ఆ పరిసయ్యుల
ద్వారానే పంపాడు.
ఆయన సమాధానంలో రెండు భాగాలున్నాయి. మొదటిది, "నేడు, రేపు
దయ్యములను పారద్రోలెదను, రోగులను స్వస్థపరచెదను"
అనే మాట. రాజకీయ బెదిరింపు యేసు ప్రభువుని పరిచర్య స్వభావాన్ని మార్చలేదు. విడుదల చేయడం, స్వస్థపరచడం, అంటే దేవుని
రాజ్యం మనుషుల జీవితాల్లోకి ప్రవేశింపచేయడం ఆయన పని. రెండవది, "మూడవ దినమున
నా పని పూర్తిచేసెదను." "నేడు, రేపు, మూడవ
దినము" అనేది "నిర్ణీత కొద్ది కాలం" అనే అర్థం వచ్చే యూదయా వ్యక్తీకరణ. "పూర్తిచేయడం" "పరిపూర్ణం
కావడం" అనే అర్థాన్ని ఇస్తుంది.
దేవుని అవసరం
"నేను నా పనిని
కొనసాగింపవలయును" అనే మాటలో దైవ ప్రణాళిక తప్పనిసరిగా నెరవేరాలనే భావం ఉంది.
"నేను నా తండ్రి పనులలో ఉండవలెను" (2:49), "మనుష్యకుమారుడు
అనేక బాధలు అనుభవింపవలెను" (9:22), "క్రీస్తు ఈ
బాధలు అనుభవించి తన మహిమలో ప్రవేశింపవలసి యుండెను కదా" (24:26). ఈ మాటలు అన్ని యేసు ప్రభువు పరిస్థితులకు బలైనవాడు కాదు. ఆయన తన మార్గాన్ని
తెలిసి, ప్రేమతో ఎంచుకున్నాడు (యోహాను 10:18). యేసు ప్రభువు మానవ రక్షణ కార్యం అత్యంత కష్టతరమైనప్పటికి
దానిని ఇష్టపూర్తిగా ఎంచుకున్నాడు.
"ప్రవక్త యెరూషలేమునకు వెలుపల
చంపబడుట సంభవింపరాదు" అనేది తీవ్రమైన వ్యంగ్యం. దేవుని పట్టణమే దేవుని
ప్రవక్తలను చంపిన పట్టణమైంది. ఆలయ ఆవరణలోనే యెహోయాదా కుమారుడు జెకర్యాను రాళ్ళతో
కొట్టి చంపారు (2రాజుల దిన. 24:20-22). ఊరియా ప్రవక్త
హతమయ్యాడు (యిర్మీయా 26:20-23). ఆయన హేరోదు
చేతిలో గలిలయలో కాక, యెరూషలేములో మరణించాడు.
"ఓ యెరూషలేమా! యెరూషలేమా!"
ఇక్కడ యేసు ప్రభువుని స్వరం పూర్తిగా మారుతుంది.
పవిత్ర గ్రంధంలో ఒకే పేరును రెండుసార్లు పిలవడం గాఢమైన ప్రేమను, ఆవేదనను
సూచిస్తుంది, ఉదా! "అబ్రాహామా, అబ్రాహామా" (ఆది. 22:11),
"మార్తా, మార్తా" (లూకా 10:41),
"సీమోనూ, సీమోనూ" (22:31). ఇక్కడ యేసు ప్రభువు
ఒక నగరాన్ని వ్యక్తిలా పిలుస్తున్నాడు. ఆ
పిలుపులో కోపం కన్నా దుఃఖం, నింద కన్నా ప్రేమ ఎక్కువగా ఉన్నది.
"నీవు ప్రవక్తలను చంపి, దేవుడు
పంపినవారిపై రాళ్ళు రువ్వుచున్నావు" అనే మాటలు వర్తమాన కాలంలో ఉన్నాయి. అంటే
ఇది గతం గురించిన కథ మాత్రమే కాదు, అప్పటికి కొనసాగుతున్న
ధోరణి. కాబట్టి యెరూషలేము దేవుని స్వరాన్ని వినడానికి నిరాకరించే ప్రతి హృదయానికి
ప్రతీక.
తరువాత వచ్చే కోడి ఉపమానం సువిశేషంలోని అత్యంత
కోమలమైన భాగాలలో ఒకటి. పాత నిబంధనలో దేవుడు తన ప్రజలను తన రెక్కల నీడలో కాపాడతాడనే
భావన తరచు కనిపిస్తుంది (కీర్తన 17:8; 36:7; 91:4; రూతు 2:12; ద్వితీ. 32:11). యేసు ప్రభువు
ఆ ఉపమానాన్ని తనకే అన్వయించుకుంటున్నాడు. అంటే యెరూషలేమును
కాపాడగోరిన దేవుని ప్రేమే తనలో ఉందని ఆయన సూచిస్తున్నాడు. ఇది ఆయన దైవత్వానికి చిన్నదైనప్పటికి
స్పష్టమైన సూచన.
కోడి గద్దలా బలమైన పక్షి కాదు. అయినా ప్రమాదం
వచ్చినప్పుడు పారిపోదు. పిల్లలను రెక్కల కింద దాచుకుని తానే ముందు నిలుస్తుంది.
హేరోదు "నక్క", యేసు "కోడి". నక్క
వేటాడే జంతువు, కోడి వేటకు గురయ్యేది.
రక్షకుడు ఈ బలహీనతనే ఎంచుకున్నాడు. శిలువపై చాపిన చేతులు ఈ రెక్కల చిత్రానికి
సంపూర్ణ నెరవేర్పు అని క్రైస్తవ సంప్రదాయం చూస్తుంది.
"ఎన్ని పర్యాయములు" అనే
మాటలో దేవుని సహనం కనిపిస్తుంది. ఆయన ఒకసారి పిలిచి వదిలేసేవాడు కాదు. అనేక
ప్రవక్తల ద్వారా, అనేక హెచ్చరికల ద్వారా, చివరికి తన
కుమారుని ద్వారా మళ్ళీ మళ్ళీ చేరదీయగోరాడు. కానీ "నీవు అంగీకరింపకపోయితివి"
అనే ఈ వాక్యం చాలా ముఖ్యమైనది. ఇక్కడ
రెండు సంకల్పాలున్నాయి, "నేను కోరితిని" అనే దేవుని సంకల్పం, "మీరు
ఇష్టపడలేదు" అనే మానవ సంకల్పం. దేవుడు సర్వశక్తిమంతుడైనా ప్రేమను బలవంతం
చేయడు. ఆయన ఆహ్వానిస్తాడు, ఎదురు చూస్తాడు. మనం ఒప్పుకోకుండా
మన హృదయంలోకి చొచ్చుకుపోడు. పునీత అగస్టీన్ చెప్పినట్లు, దేవుడు మన
సహకారం లేకుండా మనలను సృష్టించాడు, కానీ మన సహకారం లేకుండా మనలను
రక్షించడు.
తీర్పు, ఆశ
"ఇదిగో నీ గృహము
నిర్మానుష్యమగును." ఈ "గృహము" ఆలయాన్ని, నగరాన్ని, లేదా
ఇశ్రాయేలు ప్రజలను సూచిస్తుండవచ్చు. ఇది పాత నిబంధనలో దేవుని మహిమ ఆలయాన్ని
విడిచిపోయినట్లు వర్ణన ఉంది (యెహె. 10-11). క్రీ.శ. 70లో రోమా
సైన్యం యెరూషలేమును, ఆలయాన్ని నాశనం చేసినప్పుడు ఈ
మాటలు నెరవేరినట్లు లూకా సువిశేషంలో చూస్తాము.
(19:41-44; 21:20-24). అయితే ఈ మాటలను కేవలం చారిత్రక విధ్వంసానికే
పరిమితం చేయకూడదు. దేవుని సన్నిధిని తిరస్కరించిన చోటు ఎంత గొప్పదైనా అది శూన్యముగానే మిగులుతుంది. అది వ్యక్తిగత జీవితానికీ కూడా వర్తిస్తుంది.
“'ప్రభువు
పేరిట వచ్చువాడు స్తుతింపబడునుగాక!' అని చెప్పువరకు మీరు నన్ను
చూడజాలరు.” ఇది కీర్తన 118:26 నుండి వచ్చిన మాట. ఈ
వాక్యాన్ని మూడు విధాలుగా అర్థం చేసుకోవచ్చు. మొదటిది, యేసు ప్రభువు
యెరూషలేములో ప్రవేశించినప్పుడు శిష్యులు ఇదే మాటలు పాడారు (19:38). రెండవది, క్రీస్తు
మహిమతో తిరిగి వచ్చినప్పుడు అందరూ ఆయనను ప్రభువుగా ఒప్పుకుంటారు. మూడవది, "వచ్చు వరకు"
అనే మాటలో ద్వారం ఇంకా మూసుకుపోలేదనే ఆశను తెలుపుతుంది.
ప్రధాన భావాలు
యేసు ప్రభువు తన మార్గాన్ని
తెలిసి ఎంచుకున్నాడు. శిలువ ప్రమాదం కాదు, ప్రేమతో
స్వీకరించిన రక్షణ కార్యం. హేరోదు బెదిరింపు, పరిసయ్యుల సలహా ఏదీ ఆయనను ఈ భాధ్యత
నుండి నిష్క్రమించేలా చేయలేకపోయాయి.
దేవుని ప్రేమ తండ్రి ప్రేమ
మాత్రమే కాదు, తల్లి ప్రేమ
కూడా. "తల్లి తన బిడ్డను ఓదార్చునట్లు నేను మిమ్ము
ఓదార్చెదను" (యెషయా 66:13) అనే వాగ్దానం ఇదే సత్యాన్ని
చెబుతుంది.
దేవుని ప్రేమ మన స్వేచ్ఛను
గౌరవిస్తుంది. రక్షణ అందుబాటులో ఉన్నా మనం తిరస్కరించగలం.
అందుకే ప్రశ్న "దేవుడు మనలను రక్షించాలని కోరుతున్నాడా?" అని కాదు, "ఆయన రెక్కల
కిందికి రావడానికి మనం సిద్ధంగా ఉన్నామా?" అని.
మన జీవితానికి అన్వయం
భయం ముందు స్థిరంగా నిలబడటం. ఉద్యోగంలో, కుటుంబంలో, సమాజంలో
మంచి చేయబోయినప్పుడు "ఇక్కడ నుండి వెళ్ళిపొండి" అనే స్వరాలు
వినిపిస్తాయి. యేసు ప్రభువులా, నా పిలుపేమిటో తెలుసుకుని, ఈ రోజు
చేయవలసిన మంచిని ఈ రోజే చేయాలి. "నేడు, రేపు, మరునాడు"
అనే మాట విశ్వాసాన్ని రోజూ జీవించమని
నేర్పుతుంది.
సత్యాన్ని ప్రేమతో చెప్పడం. యేసు ప్రభువు హేరోదుతో గొడవపడలేదు, భయపడి
మౌనంగానూ ఉండలేదు. నిజాన్ని స్పష్టంగా, శాంతంగా చెప్పాడు. అదే సమయంలో
యెరూషలేము పట్ల తన ప్రేమను కోల్పోలేదు. సత్యం లేని ప్రేమ తప్పును సమర్థిస్తుంది, ప్రేమ లేని
సత్యం కఠినంగా మారుతుంది. క్రైస్తవ జీవితం ఈ రెండింటినీ కలపాలి.
మన "యెరూషలేము"ను
గుర్తించడం. దేవుడు నన్ను చేరదీయాలనుకుంటున్నా నేను తలుపు
మూసుకున్న చోటు ఏది? క్షమించడంలోనా, ప్రార్థనలోనా, ఏదైనా పాపపు
అలవాటును విడిచిపెట్టడంలోనా, సేవలోనా? దేవుని మాట
వినడం అలవాటైపోయి హృదయం కఠినం కాకుండా జాగ్రత్తపడాలి. నేడు మీరు ఆయన స్వరము
వినినయెడల మీ హృదయములను కఠినపరచుకొనకుడు. (కీర్తన 95:7-8).
రెక్కల కింద ఆశ్రయం పొందడం. మన భయాలు, గాయాలు, పాపాలు, అలసట
అన్నింటితోను ఆయన రెక్కల కిందికి రావచ్చు.
ప్రార్థన, దివ్యసత్ప్రసాదం, పాపసంకీర్తనం, వాక్య
ధ్యానం ఆ ఆశ్రయ స్థానాలు.
ఇతరుల కోసం ఏడ్చే హృదయం. మనల్ని తిరస్కరించినవారిపై కోపం రావడం సహజం.
కానీ యేసు ప్రభువు తనను తిరస్కరించే నగరం కోసం ఏడ్చాడు. మన చుట్టూ దేవునికి
దూరమైనవారి కోసం ప్రార్థించే, బాధపడే హృదయాన్ని ఆయన మన నుండి
కోరుతున్నాడు.
ఆత్మపరిశీలన కోసం ప్రశ్నలు
- నా పిలుపు నుండి నన్ను వెనక్కు లాగే
"సలహాలు" ఏవి? వాటికి నేను ఎలా
స్పందిస్తున్నాను?
- దేవుడు నన్ను చేరదీయాలని కోరుతున్నా, నేను "ఇష్టపడని" జీవిత ప్రాంతం ఏది?
- ఎవరి కోసం నేను యేసు ప్రభువు వలె కన్నీటితో ప్రార్థించాలి?
- దివ్యబలి పూజలో "ప్రభువు పేరిట
వచ్చువాడు ధన్యుడు" అని పాడేటప్పుడు నా హృదయం ఎలా ఉంటుంది?
- దేవుని రెక్కల కింద ఆశ్రయం పొందడానికి ఈ
వారం నేను వేయబోయే ఒక చిన్న అడుగు ఏమిటి?
ప్రార్థన
ప్రభువా, మీరు హేరోదు
బెదిరింపులకు భయపడక తండ్రి చిత్తంలో స్థిరంగా నడిచారు. మా భయాల ముందు, ఒత్తిళ్ల
ముందు నీ మార్గంలో నిలిచే ధైర్యాన్ని మాకు ప్రసాదించు. యెరూషలేము
కోసం కన్నీరు కార్చిన మీ హృదయం మా పాపాల
కోసం కూడా దుఃఖిస్తుందని మేము తెలుసుకున్నాము. కోడి తన
పిల్లలను చేరదీసినట్లు మమ్మల్ని మీ రెక్కల
నీడలో చేర్చుకొనుము. మా హృదయ ద్వారాలను మీ కొరకు తెరచి, మీ ప్రేమను అంగీకరించి, ఆ ప్రేమను
ఇతరులకు పంచే కృపను అనుగ్రహించుము. ఆమెన్.
కామెంట్‌లు
కామెంట్‌ను పోస్ట్ చేయండి