అవిలాపురి తెరేసమ్మ నవదిన ప్రార్ధనలు - ఏడవ రోజు
అక్టోబర్ 12 • స్థిరమైన ప్రార్థన జీవితం, పాపుల రక్షణ
పడిపోయినా మళ్ళీ లేవవచ్చు
ప్రార్థన జీవితంలో ఎదగాలని ప్రతి ఒక్కరూ
కోరుకుంటారు. కొన్ని రోజులు ఉత్సాహంగా ప్రార్థిస్తాం. తరువాత పనులు పెరుగుతాయి,
అలసట వస్తుంది, ప్రార్థన తగ్గిపోతుంది. కొన్నిసార్లు
కొన్ని వారాలు, కొన్ని నెలలు కూడా ప్రార్థన లేకుండా
గడిచిపోతుంది. అప్పుడు మనసులో అపరాధ భావన కలుగుతుంది. అప్పుడు ఏ ముఖం పెట్టుకుని
దేవుని ముందుకు వెళ్ళగలను?" అనిపిస్తుంది. ఈ రోజు పునీత తెరేసమ్మ జీవితం ఈ భావనకు గొప్ప జవాబు ఇస్తుంది. ఆమె కూడా
ప్రార్థనను వదిలేసింది. కానీ దేవుడు ఆమెను వదలలేదు.
వాక్యభాగాలు: లూకా 19:10, 1 థెస్సలొనీకయులకు 5:17
లూకా 19వ అధ్యాయంలో యెరికో పట్టణంలో జక్కయ్య కథ ఉంది. ఆయన పన్ను వసూలు చేసేవారికి నాయకుడు, ధనవంతుడు. ప్రజలు ఆయనను పాపిగా చూసేవారు. యేసు ప్రభువును చూడటానికి ఆయన చెట్టు ఎక్కాడు. యేసు ప్రభువు ఆ చెట్టు కింద ఆగి, అతని పేరు పెట్టి పిలిచి, ఈ రోజు నీ ఇంటికి వస్తున్నాను అని చెప్పాడు. జక్కయ్య జీవితం మారిపోయింది. ఆ సందర్భంలో యేసు ప్రభువు మనుష్యకుమారుడు తప్పిపోయినదాన్ని వెదకి రక్షించడానికి వచ్చాడు అని చెప్పాడు. మనం దేవుణ్ణి వేదకడానికి ముందే ఆయనను మనలను వెతుకుతున్నాడు అనే విషయం ఇక్కడ స్పష్టం అవుతుంది.
1 థెస్సలొనీకయులకు 5:17లో పునీత పౌలు మీరు : "ఎడతెగక ప్రార్థన చేయండి." అని చెబుతున్నాడు. ఇది కష్టమైన ఆజ్ఞలా అనిపించవచ్చు. రోజంతా మోకాళ్ళపై ఉండటం సాధ్యం కాదు. కానీ ఎడతెగని ప్రార్థన అంటే నిరంతరం దేవుని స్పృహలో జీవించడం, ఆయనవైపు మనసు తిప్పుతూ ఉండటం అని తిరుసభ సంప్రదాయం వివరిస్తుంది. తెరేసమ్మ తన సోదరీమణులకు ఈ అలవాటునే నేర్పింది.
ప్రార్థనను వదిలేసిన తెరేసమ్మ
తెరేసమ్మ తన స్వీయ చరిత్రలో ఒక నిజాయితీ గల విషయం
రాసింది. తన యవ్వనంలో కొంతకాలం ఆమె ప్రార్థనను విడిచిపెట్టింది. ఆమె మనసులో
"నేను పాపిని, దేవుని ముందు ప్రార్థించడానికి
యోగ్యురాలిని కాను" అనే ఆలోచన వచ్చింది. అది వినయంలా కనిపించినా, వాస్తవానికి అది ఒక శోధన అని ఆమె తరువాత గ్రహించింది. ఎందుకంటే
ప్రార్థన మానేస్తే మనం దేవుని కృపకు మరింత దూరమవుతాం. అప్పుడు పాపంలో పడటం
సులభమవుతుంది. తన జీవితంలో ఆ కాలాన్ని ఆమె ఎంతో బాధతో గుర్తుచేసుకుంది.
కానీ ఆమె తిరిగి ప్రార్ధించడం మొదలుపెట్టింది. యేసు ప్రభువు శ్రమల స్వరూపం ముందు ఆమె హృదయం కరిగినప్పుడు, ఆమె ఇంకెప్పుడూ ప్రార్థనను వదలకూడదని నిర్ణయించుకుంది. ఆ తరువాత ఆమె
ప్రార్థనా గురువుగా మారి లక్షలాది మందికి ప్రార్థనను నేర్పింది. పడిపోయిన వ్యక్తి
కూడా దేవుని చేతిలో గొప్ప సాధనంగా మారగలడని ఆమె జీవితం చూపిస్తుంది.
మనం ప్రార్థనను ఎందుకు వదిలేస్తాం?
ప్రార్థన వదిలేయడానికి కారణాలు చాలా
ఉంటాయి. మొదటిది, పనుల ఒత్తిడి. "సమయం లేదు" అని
అనుకుంటాం. రెండవది, ఆధ్యాత్మిక శుష్కత. ప్రార్థనలో ఏమీ
అనిపించకపోతే విసుగు వస్తుంది. మూడవది, అపరాధ భావన. పాపం
చేసిన తరువాత దేవుని ముందుకు వెళ్ళడానికి సిగ్గు కలుగుతుంది. నాల్గవది, సమాధానం రాలేదనే నిరాశ. మన ప్రార్థనకు దేవుడు సమాధానం ఇవ్వలేదని
భావించి ఆపేస్తాం. ఐదవది, అలవాటు లేకపోవడం. ఒకసారి క్రమం తప్పితే
మళ్ళీ మొదలుపెట్టడం కష్టంగా అనిపిస్తుంది.
ఈ కారణాలన్నీ మానవ సహజమే. వీటి గురించి
సిగ్గుపడనవసరం లేదు. కానీ వీటిని గుర్తించి, వాటిని
దాటి ముందుకు సాగాలి. మనం ఎన్నిసార్లు పడిపోయినా, దేవుడు
మళ్ళీ మనలను చేరదీయడానికి సిద్ధంగా ఉన్నాడు.
దేవుడు వెదికే కాపరి
తప్పిపోయిన గొర్రె ఉపమానంలో కాపరి తొంభై తొమ్మిది గొర్రెలను వదిలి, తప్పిపోయిన ఒక్క గొర్రెను వెతుకుతూ వెళ్తాడు. దాన్ని కనుగొన్నప్పుడు కోపంతో కొట్టడు, సంతోషంతో భుజాలపై వేసుకుంటాడు. అదే దేవుని హృదయం. మనం ప్రార్థనలో తప్పిపోయినా, ఆయన మన కోసం వెతుకుతూనే ఉంటాడు. తిరిగి వచ్చినప్పుడు నిందించడు, పరలోకంలో సంతోషం కలుగుతుందని యేసు ప్రభువు చెప్పాడు. కాబట్టి ఎంతకాలం ప్రార్ధనకు దూరంగా ఉన్నా, తిరిగివచ్చే ధైర్యం చేయండి.
పునీత సూక్తి: ప్రేమ చర్యలు
"ప్రేమను వ్యక్త పరిచే చర్యలు తరచు చేయడం అలవాటు చేసుకో. అవి ఆత్మను
రగిలించి కరిగిస్తాయి." – తెరేసాకు ఆపాదించబడిన మాట
ఈ మాట తెరేసా ఆధ్యాత్మికతకు సరిపోయే సారాంశాన్ని చెబుతుంది. ప్రార్థన అంటే గొప్ప అనుభూతుల కోసం ఎదురుచూడటం కాదు, ప్రేమను ఆచరణలో చూపించడం. చిన్న ప్రేమ చర్యలు అంటే ఏమిటి?
ఉదయం లేవగానే "యేసయ్యా, నిన్ను ప్రేమిస్తున్నాను" అని చెప్పడం.
పనిలో అలసట వచ్చినప్పుడు ఆ అలసటను ఆయనకు
కానుకగా అర్పించడం.
కోపం రాబోతున్నప్పుడు ఒక్క క్షణం ఆగి
ప్రార్థించడం.
ఒక పేదవానికి చిన్న సహాయం చేయడం.
రాత్రి పడుకునే ముందు ఆ రోజు చేసిన
మేలుకు కృతజ్ఞతలు చెప్పడం.
ఈ చిన్న చర్యలు ఒక్కొక్కటిగా కనిపించినా, వాటిని తరచు చేస్తే మన హృదయం క్రమంగా మారుతుంది. నిప్పులో కట్టెలు వేసినట్లు, ప్రతి చిన్న ప్రేమ చర్య మన ప్రేమను రగిలిస్తుంది.
"దృడ సంకల్పం"
తెరేసా తన "పరిపూర్ణతా మార్గం" గ్రంథంలో ప్రార్థనా జీవితానికి ఒక ముఖ్యమైన విషయం చెప్పింది: "దృడ నిర్ణయం" కలిగి ఉండాలని చెబుతుంది. అంటే ప్రార్ధన మార్గంలో ఎన్ని అడ్డంకులు వచ్చినా, ఎన్నిసార్లు పడిపోయినా ప్రార్థనను విడిచిపెట్టకూడదనే దృఢ మైన తీర్మానం. అది కేవలం ఉత్సాహం కాదు, ఇష్టపూర్వకమైన నిర్ణయం. ఉత్సాహం వస్తుంది, పోతుంది. కానీ నిర్ణయం నిలుస్తుంది. ప్రార్థన ఆనందంగా అనిపించే రోజుల్లోనే కాదు, అనిపించని రోజుల్లో కూడా ఆయన ముందు కూర్చోవడమే నిజమైన స్థిరత్వం.
ఎడతెగక ప్రార్థన చేయడం ఎలా?
పౌలు చెప్పిన "ఎడతెగక ప్రార్థన" అంటే కళ్ళు మూసుకుని రోజంతా కూర్చోవడం కాదు. పనిలో ఉండగానే మనసును దేవుని వైపు తిప్పుకోవడం. కొన్ని సులభమైన అలవాట్లు చేసుకోవాలి.
ఉదయం మొదటి ఆలోచన దేవుని గురించి ఉండేలా
చూసుకోవడం.
గడియారం గంటలు కొట్టినప్పుడల్లా ఒక్క
క్షణం "ప్రభువా, నీ సన్నిధిలో ఉన్నాను" అని చెప్పడం.
ప్రయాణంలో జపమాల లేదా చిన్న ప్రార్థనలు
జపించడం.
భోజనం ముందు, తరువాత
కృతజ్ఞతా ప్రార్థన చేయడం.
రాత్రి నిద్రకు ముందు ఆ రోజును దేవునికి అప్పగించడం.
ఇలా చేస్తే రోజంతా దేవునితో సంభాషణలాగా
మారుతుంది. కొద్ది వారాల్లోనే ఈ అలవాటు మన స్వభావంలో భాగమవుతుంది.
పాపుల రక్షణ కోసం ప్రార్థన
తెరేసమ్మ ఆధ్యాత్మికతలో ఆత్మల రక్షణ పట్ల గొప్ప ఆసక్తి ఉంది. తన స్వీయ చరిత్రలో ఆమె ఒక గొప్ప దర్శన అనుభవాన్ని వివరించింది. ఆ అనుభవం తరువాత పాపుల మారుమనస్సు కోసం ఆమె ఇంకా ఎక్కువగా ప్రార్థించింది, త్యాగాలు చేసింది. ఆమె మఠంలోని ప్రతి సోదరి కూడా ఆత్మల రక్షణ కోసం ప్రార్థించాలని ఆమె కోరుకుంది. ఎందుకంటే దేవుని కరుణ ప్రతి ఒక్కరికీ అందాలని ఆమె హృదయం తపించింది.
మన కుటుంబాల్లో కూడా దేవుని నుండి దూరమైన
వారు ఉంటారు. కొడుకు, కూతురు, భర్త,
భార్య, స్నేహితుడు ఎవరైనా కావచ్చు. వారిని
బలవంతం చేయడం కంటే వారి కోసం ప్రార్థించడం ఎక్కువ ఫలితాన్నిస్తుంది. పునీత మోనిక
తన కుమారుడైన అగస్టీను మారుమనస్సు కోసం ఏళ్ళ తరబడి కన్నీళ్ళతో ప్రార్థించింది.
చివరికి అగస్టీను గొప్ప పునీతుడయ్యాడు. నిరాశ చెందకుండా ఓర్పుతో ప్రార్థించినందుకు
ఇది గొప్ప ఉదాహరణ.
మన కుటుంబంలో స్థిరమైన ప్రార్థన
కుటుంబ ప్రార్థన ఇంటిని కలిపే కట్టు
వంటిది. ప్రతి రోజు ఒకే సమయంలో కుటుంబమంతా కలిసి ఐదు నిమిషాలు ప్రార్థిస్తే,
ఇంట్లో శాంతి పెరుగుతుంది. ఒక్క రోజు తప్పిపోయినా నిరుత్సాహపడకండి.
మరుసటి రోజు మళ్ళీ మొదలుపెట్టండి. పిల్లలు తల్లిదండ్రుల పట్టుదలను చూసి
నేర్చుకుంటారు. మీరు ప్రార్థనలో పడిపోయి, మళ్ళీ లేవడం వారు
చూస్తే, వారికి కూడా తిరిగివచ్చే ధైర్యం
వస్తుంది.
మళ్ళీ మొదలుపెట్టడానికి ఐదు చిన్న అడుగులు
ప్రార్థనను కొంతకాలం వదిలిపెట్టిన తరువాత
తిరిగి మొదలుపెట్టడం కష్టంగా అనిపిస్తుంది. అప్పుడు పెద్ద లక్ష్యాలు పెట్టుకోకండి.
ఈ ఐదు చిన్న అడుగులు ప్రయత్నించండి.
మొదటిది, నిజాయితీ.
"ప్రభువా, నేను చాలా రోజులుగా నీకు దూరంగా
ఉన్నాను" అని ఆయనతో నిజం చెప్పండి. దాచుకోవాల్సిన అవసరం లేదు.
రెండవది, క్షమాపణ.
వీలైతే పాపసంకీర్తనానికి వెళ్ళండి. అక్కడ దేవుని క్షమ పొందిన హృదయం తేలికగా
మారుతుంది.
మూడవది, చిన్న
సమయం. రోజుకు కేవలం ఐదు నిమిషాలతో ప్రారంభించండి. అంతకంటే ఎక్కువ అవసరం లేదు.
నాల్గవది, నిర్ణీత
సమయం. ప్రతిరోజూ ఒకే సమయాన్ని ఎంచుకోండి. ఉదయం లేవగానే లేదా రాత్రి పడుకునే ముందు.
ఐదవది, తోడు.
కుటుంబ సభ్యుని లేదా స్నేహితుని ప్రార్థనలో తోడుగా చేసుకోండి. ఇద్దరు కలిసి
ప్రార్థిస్తే అలవాటు నిలుస్తుంది.
ఈ చిన్న అడుగులు కొన్ని వారాల్లో మీ
ప్రార్థనను మళ్ళీ స్థిరపరుస్తాయి. ఏదైనా రోజు తప్పిపోతే నిరాశ చెందకండి, మరుసటి రోజు మళ్ళీ మొదలుపెట్టండి. దేవుడు లెక్కలు వేసుకుని మనలను
శిక్షించడు, మన ప్రయత్నాన్ని ప్రేమతో చూస్తాడు.
అవిలాపురి తెరేసమ్మ నవదిన ప్రార్ధనలు- ఏడవ రోజు
స్థిరమైన ప్రార్థన జీవితం, పాపుల రక్షణ
గురువు: పిత, పుత్ర,
పవిత్రాత్మ నామమున.
ప్రజలు: ఆమెన్.
గురువు: ప్రభువు, మీతో ఉండునుగాక
.
ప్రజలు: మీ ఆత్మతోను ఉండును గాక
గురువు: ప్రియ సహోదరి, సహోదరులారా, తెరేసమ్మ కొంతకాలం ప్రార్థనను వదిలివేసినది, తరువాత మళ్ళీ తిరిగి ప్రార్ధనను ప్రారంభించినది. ఈ రోజు పడిపోయినా మళ్ళీ మొదలుపెట్టే ధైర్యాన్ని, పాపుల రక్షణ కోసం ప్రార్థనను ధ్యానిద్దాం.
ప్రార్ధన
గురువు: ప్రార్ధించుదము: కరుణగల తండ్రీ,
తప్పిపోయినవారిని వెదకి రక్షించడానికి నీ కుమారుడు వచ్చాడు. అవిలాపురి
తెరేసమ్మ ప్రార్థనలో పడిపోయినా తిరిగి ప్రార్ధించి,
ప్రార్థనా
గురువు అయింది. ఆమెతో కలిసి స్థిరమైన ప్రార్థన జీవితాన్ని, పాపుల
పట్ల నీ కరుణను మాకు నేర్పుము. మా ప్రభువైన యేసు క్రీస్తు ద్వారా ఈ మనవి చేయుచున్నాము.
ప్రజలు: ఆమెన్.
వాక్య పఠనం
పఠకుడు (1
థెస్సలొనీకయులకు 5:17):
సదా ప్రార్ధింపుడు.
పఠనకుడు: ఇది ప్రభువు వాక్కు .
ప్రజలు: సర్వేశ్వరునికి వందనములు.
స్థిరమైన ప్రార్థన గురించి విన్నపాలు
గురువు: ప్రార్థనలో అలసిపోయి, వదిలేసే సమయాల్లో
.
ప్రజలు: ప్రభువా, నీవు మమ్మల్ని ఎప్పుడూ వదలక, ప్రార్దనలో నిలుపుము
గురువు: పడిపోయి, సిగ్గుతో
నీ ముందుకు రాలేకపోయే సమయాలలో .
ప్రజలు: ప్రభువా, మళ్ళీ ప్రార్దనను మొదలుపెట్టే ధైర్యం ఇవ్వు.
గురువు: క్రమం తప్పని ప్రార్థనా జీవితం
కోసం.
ప్రజలు: ప్రభువా, ప్రతిరోజూ నీ సన్నిధికి మమ్మల్ని నడిపించు.
పునీత సూక్తి
గురువు: అవిలా పునీత తెరేసా ఇలా అంది:
"ప్రేమ చర్యలు తరచు చేయడం అలవాటు చేసుకో. అవి ఆత్మను రగిలించి కరిగిస్తాయి."
గురువు: చిన్న ప్రేమ చర్యలు కాలక్రమంలో
హృదయాన్ని మారుస్తాయి.
ప్రజలు: ప్రభువా, "యేసువా, నిన్ను ప్రేమిస్తున్నాను" అని తరచు
చెప్పే అలవాటు ఇవ్వు.
గురువు: ప్రార్థన ఒక్కరోజు అనుభవం కాదు, రోజువారీ అలవాటు.
ప్రజలు: ప్రభువా, నిర్ణీత
సమయంలో ప్రార్థించే క్రమశిక్షణ ఇవ్వు.
పాపుల రక్షణ కోసం
గురువు: నీ నుండి దూరమైన మా ప్రియమైనవారి
కోసం.
ప్రజలు: ప్రభువా, వారిని
నీ ప్రేమతో తిరిగి మీ వద్దకు వచ్చేలా చేయండి.
ప్రజలు: ప్రభువా, వారిని
నీ కరుణతో రక్షించు.
ప్రజలు: ప్రభువా, వారికి నీ క్షమాపణ సంతోషాన్ని ఇవ్వు.
ఆత్మపరిశీలన
గురువు: నేను ప్రార్థన ఎప్పుడు
వదిలేస్తున్నాను, ఎందుకు? (మౌనం)
పడిపోయిన తరువాత మళ్ళీ దేవుని వైపు
తిరగడానికి నాకు ఏది సహాయపడుతుంది? (మౌనం)
నా కుటుంబంలో లేదా స్నేహితుల్లో దేవుని
నుండి దూరమైన వారి కోసం నేను ప్రార్థిస్తున్నానా? (మౌనం)
నేటి ప్రార్థన
గురువు: అందరం కలిసి ప్రార్థిద్దాం.
అందరూ: దయగల ప్రభువా, మేము తరచు ప్రార్థనలో అలసిపోతాము, వదిలేస్తాము.
నీవు మమ్మల్ని ఎప్పుడూ వదలవు. క్రమం తప్పని ప్రార్థనా జీవితం కొనసాగించే శక్తిని
మాకు ఇవ్వు. నీ నుండి దూరమైన మా ప్రియమైనవారిని, లోకంలోని
పాపులందరినీ నీ ప్రేమతో మీ వద్దకు వచ్చేలా చేయుము, తెరేసమ్మ
నిరుత్సాహంలో మేము
ఆగిపోకుండా మమ్మల్ని ప్రోత్సహించండి. ఆమెన్.
మధ్యవర్తిత్వ విన్నపాలు
గురువు: పునీత అవిలాపురి తెరేసమ్మ ,
ప్రజలు: మా కోసం ప్రార్థించండి.
గురువు: తిరుసభ ప్రార్థనా గురువా,
ప్రజలు : మా కోసం
ప్రార్థించండి.
గురువు: తిరుసభ పండితురాలా,
ప్ర.: మా కోసం ప్రార్థించండి.
గురువు: కార్మెల్ సభ సంస్కర్తా,
ప్ర.: మా కోసం ప్రార్థించండి.
గురువు: ప్రభువు ప్రేమలో జ్వలించిన ఆత్మా,
ప్ర.: మా కోసం ప్రార్థించండి.
వ్యక్తిగత విన్నపాలు
గురువు: ఇప్పుడు మన కుటుంబాల అవసరాలను, ఈ నవదినాలలో మనం అడుగుతున్న ప్రత్యేక ఉద్దేశ్యాలను ప్రభువుకు సమర్పిద్దాం. (కొద్దిసేపు మౌనం, లేదా ప్రజలు తమ ఉద్దేశ్యాలను పలకవచ్చు)
గురువు: ప్రభువా, మా
మనవి ఆలకించు.
ప్రజలు: మా ప్రార్థనను ఆలకించు ప్రభువా.
గురువు: నవదిన ఉద్దేశ్యాల కోసం మనం కలిసి
ప్రార్థిద్దాం.
అందరూ: పరలోక జపం, మంగళ వార్త
జపం, త్రిత్వ స్తోత్రం (మీ విచారణ సంప్రదాయ పాఠం ప్రకారం)
గురువు: ప్రార్ధించుదము.
ప్రేమమయుడైన దేవా, అవిలా
పునీత తెరేసా మాదిరిగా పడిపోయినా తిరిగి లేచి, స్థిరంగా
ప్రార్థించే వరం మాకు ప్రసాదించు. మా ప్రభువైన యేసు క్రీస్తు ద్వారా ఈ మనవి వేడుకొనుచున్నాము.
ప్రజలు: ఆమెన్.
గురువు: ఈ రోజు సంకల్పం: ప్రతిరోజూ ఒక నిర్ణీత సమయంలో, కొద్ది నిమిషాలైనా ప్రార్థన చేయాలని నిర్ణయం తీసుకోండి. ఈ రోజు ఒక చిన్న ప్రేమ చర్యను, "యేసయ్యా, నిన్ను ప్రేమిస్తున్నాను" అని చెప్పండి.
గురువు: ప్రభువు మీతో ఉండుగాక.
ప్రజలు: మీ ఆత్మతోను ఉండునుగాక
గురువు: సర్వశక్తిమంతుడైన దేవుడు, పిత పుత్ర పవిత్రాత్మ మిమ్ము కుమారుడు, పరిశుద్ధాత్మ,
మిమ్ములను ఆశీర్వదించి కాపాడుదురుగాక.
ప్రజలు: ఆమెన్.
గురువు: సమాధానముతో వెళ్ళుము.
ప్రజలు: దేవునికి కృతజ్ఞతలు.
కామెంట్‌లు
కామెంట్‌ను పోస్ట్ చేయండి